Anonimo escribió "
Esta fin de semana celébrase en Barcelona o vixésimo terceiro Congreso da Asociación Internacional para a Defensa das Linguas e das Culturas Ameazadas (AIDLCM, nas súas siglas en francés), unha entidade constituída hai máis de medio século que acolle realidades lingüísticas minorizadas de todo o mundo.
O Presidente da Mesa, Carlos Callón, que asistirá xa desde hoxe a este encontro internacional, intervirá nunha das conferencias previstas para a xornada de mañá sábado cunha comunicación na que explicará cal é a actual situación social do galego desde a perspectiva social e legal. Callón fará énfase na “alarmante involución” que está a vivir o proceso de normalización lingüística en Galiza desde a chegada de Alberto Núñez Feijóo ao goberno da Xunta, ben como no “deterioro” do marco lexislativo, nomeadamente en ámbitos como o ensino e as administracións públicas.
A Mesa, principal entidade cultural de Galiza en número de asociadas e
asociados, con case 4.000 membros, aproveitará a súa participación no
Congreso da AIDLCM, a través do seu presidente, non só para denunciar
internacionalmente a “moi delicada” situación da nosa lingua propia,
senón tamén para “pór en valor” e “destacar a impresionante reacción
cívica da sociedade galega contra as medidas contrarias á lingua e á
cultura propias”.
A asociación cidadá en defensa do galego,
nacida hai 24 anos, participa activamente desde hai anos en diversos
foros e organismos internacionais de defensa da diversidade lingüística e
cultural e de observancia dos dereitos lingüísticos. Para alén de ser
entidade impulsora da Declaración Universal de Dereitos Lingüísticos, A
Mesa é entidade interlocutora en Galiza do Comité de expertos do
Consello de Europa encargado de velar pola aplicación da Carta Europea
das Linguas Rexionais ou Minoritarias (CELRM), ratificada polo Estado
español en 2001. Fixo parte, así mesmo, da Axencia Europea para as
Linguas Minorizadas (EBLUL), organismo con rango de entidade consultiva
ante o Consello de Europa e ante a ONU.
"
