Portal de Noticias Cedeira OnLine Café Bar A MARINA

Do mesmo xeito que xa fixeron Ferrol e Ortigueira fai uns dez anos, agora é Cedeira a que se apunta á zona azul. O Concello da vila acaba de aprobar unha ordenanza municipal que recolle a posta en marcha dun sistema que pretende aliviar o tráfico nas zonas máis congestionadas da localidade.

O centro é unha delas, en concreto a rúa Ezequiel López. Será precisamente nesta vía onde arrinque o sistema da zona azul, un método que en Cedeira obrigará a mover o coche noventa minutos despois do estacionamento.

O condutor deberá deixar á vista a hora á que aparcou o vehículo para que os axentes da Policía Local poidan comprobar que non se superou o tempo máximo permitido. No caso de que o condutor excedeuse, será multado.

Coches nas beirarrúas

Con esta iniciativa, o Concello pretende aliviar o tráfico por unha das vías máis transitadas do centro. Tal e como comentan varios dos comerciantes da rúa, en Ezequiel López é habitual atopar coches estacionados sobre as beirarrúas, o que dificulta o paso de vehículos grandes e ata de autobuses. «Chegamos a un punto no que todo o mundo quere chegar en coche ata a porta de todos sitios», explica o alcalde da localidade, José Luis Vergara.

Tamén a escasa rotación de vehículos supón un problema nesta céntrica rúa do municipio. É habitual que varios coches permanezan estacionados nela durante varias semanas, segundo relatan os comerciantes, algo que complica o estacionamento a aqueles veciños que queren acudir á zona vella para facer as súas compras, pois Ezequiel López mide apenas 150 metros.

Reloxos de cartón

É por iso polo que o Concello pretende repartir uns reloxos de cartón a todos os veciños, para que deste xeito poidan sinalar a hora de estacionamento.

Se a posta en marcha da zona azul na céntrica rúa sae ben, o sistema estenderase ás inmediacións da praza de Galicia, un lugar no que «pola concentración de entidades bancarias e supermercados tamén é habitual que moitos condutores aparquen nas beirarrúas para facer os seus recados». Coa aplicación da zona azul, o Concello «dá resposta a unha petición dos propios comerciantes», explica o alcalde de Cedeira. Eles mesmos aseguran que aínda que as dificultades para aparcar e ata circular pola vía existen durante todo o ano, é durante os meses de verán cando a situación se complica.

É por iso polo que a maioría aproban a iniciativa do Concello de Cedeira. Máis aínda, aclaran, cando o centro da vila xa empeza a sufrir as consecuencias de que sexa a parte nova do municipio a que absorba á maioría de compradores.

Fernando Otero , un dos propietarios da farmacia localizada en Ezequiel López, aplaude a posta en marcha da zona azul. Coincide con outros comerciantes en que son moitos os que queren chegar co coche ata a porta do establecemento, pero entende que algúns dos seus clientes, por exemplo, queiran achegarse o máis posible á farmacia cando van recoller varias caixas de cueiros.

Os veciños residentes nesta rúa «poderían aparcar os seus vehículos un pouco afastados e así deixar sitio a quen veñen facer os seus recados», comenta. Deste xeito «tamén se revitalizaría esta zona».

Link: VONLIne