Portal de Noticias Cedeira OnLine Café Bar A MARINA - BNG - 25 de Xullo

Movámonos pola nosa lingua e polo dereito ao traballo

Imos celebrar este ano o Día da Patria Galega nun contexto político de
grave agresión contra os nosos dereitos como pobo. O Goberno do Partido
Popular na Galiza fixou a súa prioridade na destrución da nosa lingua.
Comezan por reducir a súa cativa presenza no ensino e por eliminar o
requisito do seu coñecemento para o acceso á función pública. Teñen un
obxectivo político claro: destruír a nosa conciencia de sermos galegos
e galegas.

Paralelamente, no contexto da grave crise económica que sufrimos optan
por recortar dereitos nos servizos públicos (ensino, sanidade,...) e por
aliñarse cos intereses das grandes empresas. Non usan o goberno galego
para defender sectores básicos da nosa economía. Tampouco se
dispoñen a impulsar o emprego desde a iniciativa pública ou axudando á
pequena e mediana empresa. Sintonizan con todo o que sexa reducir
dereitos sociais e laborais. Venden a emigración dos nosos mozos e mozas
como panacea. Só utilizan Galiza ao servizo dos intereses políticos do PP
a nivel estatal.

Hai que moverse contra pretensións tan destrutivas. Un goberno así
é mortal para sermos galegos e galegas con dignidade e lograrmos
algún día o dereito pleno a vivir e traballar na propia Galiza. O BNG
defende unha política de igualdade: a igualdade para o noso idioma
e unha política económica que favoreza o dereito de todos e todas ao
traballo. Esta é a verdadeira política democrática. Por iso facemos un
chamamento a participar na mobilización do Día da Patria en Santiago
en defensa da nosa existencia como pobo con dereitos. De forma moi
especial en defensa da lingua galega como lingua verdadeiramente oficial
a todos os efectos, e do dereito ao posto de traballo digno na propia terra.
Estes son dous dereitos básicos para calquera pobo do mundo.

“Porque o noso deber está en asegurar o dereito ao traballo remunerado,
para que ningún irmán noso emigre por necesidade.”
Sempre en Galiza. Castelao

Link: BNG Galiza