 | Non se converterá nunha residencia para a Terceira Idade |
 O Hotel Vila de Cedeira xa non se converterá nunha residencia para a
Terceira Idade tal e como se esperaba desde o goberno local, despois de
que un grupo de empresarios decidise adquirir o inmoble por 2,6 millóns
de euros. Aínda que o negocio segue ofrecendo servizo de restauración,
a pretensión dos novos donos é darlle un xiro á actividade potenciando,
sobre todo, o lecer nocturno.
Finalmente, e despois de moitas especulacións, o Hotel Vila de Cedeira,
non se converterá nunha residencia para a Terceira Idade, tal e como se
desexaba desde o goberno local cedeirense, xa que, como se lembrará,
desde a Concellaría de Industria, Comercio e Turismo, que dirixe o
nacionalista Alfredo do Río, confiábase en que a Xunta de Galicia, a
través da Consellería de Vicepresidencia, adquirise o hotel para
convertelo nunha residencia para maiores. Aquela pretensión non chegou
a materializarse. De feito, os técnicos de Vicepresidencia nunca
chegaron a revisar as instalacións de Campo do Hospital, aínda que
desde o goberno municipal de Cedeira tíñase o convencemento de que así
o farían. O propio Alfredo do Río mostrábase moi entusiasmado coa idea
de reconverter o hotel nun centro de atención a maiores, xa que a
transformación non requiriría un gran investimento, aparte, está claro,
dos 2,6 millóns de euros que os antigos propietarios pedían polo
inmoble.
Hai uns meses un grupo de empresarios -tres socios- adquiriu o hotel,
que está a ser obxecto dunha remodelación, algo que non impide que o
servizo de restaurante e cafetaría siga funcionando con total
normalidade.
Desde a xerencia do local, en cambio, asegurouse a este diario que un
negocio hostaleiro neste lugar non é suficientemente rendible, xa que o
hotel só funciona ben tres meses ao ano. Por este motivo, a nova
dirección do centro prevé reconverter as instalacións, de máis de cinco
mil metros cadrados de superficie, nun local que ofrecerá despedidas de
solteiro, reunións privadas e festas de fin de semana, todo isto, tal e
como reza na campaña promocional do novo establecemento, "nun ambiente
íntimo e coa mellor compañía". A Vila de Cedeira perderá este nome e
converterase nun novo negocio bautizado como Cienfuegos.
Unha vez que conclúan os traballos de reforma do inmoble, para os que
xa se solicitou permiso no Concello, o hotel Vila de Cedeira deixará
atrás unha longa traxectoria, que se remonta 13 anos antes, cando a
familia Breizo puxo en marcha en Montoxo este negocio, que naceu como
hostal.
Por outra banda, a páxina web da Vila de Cedeira segue activa e permite
consultar prezos de habitacións, así como as instalacións, aínda que
tal e como manifestaron desde a xerencia, xa non se aceptan reservas.
Link: DFONLine
|
|
|
|
| |
| Enlaces Relacionados |  |
| Votos del Artículo | |
Puntuación Promedio: 0
votos: 0
| |
| Opciones | |
|
