Portal de Noticias Cedeira OnLine Café Bar A MARINA - Paro biolóxico subvencionado para o percebe

As confrarías de pescadores da provincia da Coruña, Corme e Laxe anunciaron hoxe que solicitarán un paro biolóxico subvencionado para o percebe en toda Galicia, ante os problemas de crecemento e reprodución que vén presentando nos últimos anos.

En declaracións a Efe, o patrón maior da Coruña, Manuel Cao, dixo que, tras unha reunión celebrada o pasado día 27 de marzo en Santiago, decidiron estudar esta medida debido ao gran descenso da súa produción, así como solicitar un estudo á Consellería de Pesca sobre as causas desta diminución.

Neste sentido, Cao explicou que o furtivismo segue sendo a "gran secuela" para o sector, pero apuntou que nos últimos tempos o percebe "non ten dureza ningunha, nin rende o que ten que render", aínda que descoñece se se trata dun problema da calidade da auga, do propio percebe ou do substrato da pedra, polo que considerou necesario o estudo.

Respecto ao furtivismo, o patrón maior da Coruña informou de que pedirán ao novo Goberno da Xunta que se penalice o furtivismo, que se cmpran integramente as sancións, e que as penas se conmuten por traballos sociais.

Así mesmo, comunicou que mañá xoves 35 percebeiros farán garda na zona da Torre de Hércules para evitar accións deste tipo, para o que contan co apoio da Xunta e das forzas e corpos de seguridade do Estado.

Polo momento, dixo que secundan a proposta de paro as confrarías da Coruña, Corme, Laxe, Cedeira, Ferrol, Muxía e Camelle, pero Manuel Cao confía en que se vaian sumando máis, para o que manterá un encontro informal o vindeiro sábado con máis patróns das confrarías afectadas.

Link: ECGONLine