As obras de acondicionamento da praia alteran o ecosistema do areal
Fecha Miércoles, 02 junio a las 12:23:18 Tema PHP-Nuke
Un ano máis no Concello de Cedeira inícianse as obras de presunto
“acondicionamento” do areal da Magdalena de cara ao verán, sen ningún
tipo de estudo de impacto ambiental e sen ter en conta os danos
ambientais que supoñen.
Nesta ocasión nin sequera se instalaron carteis indicando o propósito, a
duración e o presuposto da obra. Hai que lembrar que o ano pasado as
obras emprendidas pola Demarcación de Costas en Galicia, que duraron
tres meses e contaron cun orzamento superior ao millón de euros,
quedaron reducidas a nada en cuestión de días polos primeiros temporais
do outono. Incluso foron prexudiciais para o propio areal, xa que se
aportaron materiais como pedras de gran tamaño, restos de obra e vidros
que estaban enterrados nas zonas de extracción e agora quedaron ao aire
na liña de praia.
Nesta época do ano, o areal de Cedeira é unha zona importante de
acubillo para moitas especies de aves que se alimentan neste areal e
outras que realizan a súa migración primaveral. Entre as especies
afectadas están a gaivota patiamarela, a gaivota chorona, a gaivota
cabecinegra, o carrán común, o carrán cristado, o carrán pequeno, o
mazarico chiador, o mazarico rubio, o pilro curlibico, o pilro
tridáctilo, así como a píllara real e a píllara das dunas. Esta última
especie, coñecida científicamente como Charadrius alexandrinus, atópase
no Catálogo Galego de Especies Ameazadas como "vulnerable", atopándose
as últimas colonias de nidificación de Galicia nos areais da Costa
Ártabra. Está constatada a súa cría en Valdoviño, soportando a presencia
de bañistas e veraneantes, polo que non sería raro que tamén escolleran
a praia de Cedeira para criar, sempre que as continuas obras o
permitisen.
© 2010 Verdegaia
Por outra banda, na praia está constatada a presencia de máis de setenta
especies de moluscos, moitas das cales probablemente morrerán ao
removerse e alterarse continuamente o sustrato no que viven.
Ademais dos prexuízos ambientais, os ruídos e as vibracións da
maquinaria pesada a menos de trinta metros do CEIP "Nicolás del Río"
están a ocasionar continuas molestias ao profesorado e ao alumnado do
centro.
Por último dende Verdegaia queremos lembrar que ata o momento a única
causa coñecida para explicar a ausencia de area na Praia da Magdalena é o
espigón do porto pesqueiro, sendo esta circunstancia de sobra coñecida
pola Demarcación de Costas. Sen embargo, en vez de buscar unha solución
definitiva ao problema, a administración ambiental adícase a desbaldir
cada ano centos de miles de euros en "acondicionamentos" que o mar se
encarga de "reacondicionar" rápidamente, xa que as mareas e os temporais
arrastran rápidamente fóra do areal os miles de metros cúbicos de area
que aportan as máquinas.
Dende Verdegaia queremos facer un chamamento ás autoridades, tanto
estatais como autonómicas e locais, para que prevaleza o sentido común e
se faga un estudio serio sobre o areal cedeirés que permita acadar unha
solución definitiva que satisfaga a todas as partes.
Link: VerdegaiaONLine
|
|