O fiscal pide a inhabilitación do arquitecto de Narón
Fecha Miércoles, 19 mayo a las 13:26:32
Tema PHP-Nuke
O arquitecto municipal de Narón, Manuel Villar Álvarez, actualmente en
excedencia, enfróntase a penas de multa e inhabilitación que pide o
fiscal polo exceso construtivo ou usos do complexo Odeón, sobre todo, do
hotel Husa. Segundo o escrito de acusación provisional, entre os anos
2000 e 2004 iniciáronse o proxecto e demais xestións para a construción
do centro comercial e o hotel. Entón o técnico municipal era o sinalado.
Durante ese período, di a representante do Ministerio Público, informou
favorablemente sobre as licenzas necesarias: o 31 de xullo do 2000
fíxoo para a licenza e un mes despois para a apertura e funcionamento.
Pero, respecto do hotel, existiron modificacións no
proxecto inicial que contaron, engade a acusación pública, coa
conformidade de Villar: a licenza de execución inicial de 22 de abril do
2003 foi informada favorablemente, do mesmo xeito que a modificación
feita dous meses despois. Noutros dous pronunciamientos máis do técnico
avaláronse outras modificacións. A xuízo da fiscal, «tales licenzas
incumprían de forma manifesta os parámetros do Plan Xeral de 1985 que
era de aplicación e que deberon de ser aplicados neste edificio».
Especifica as ordenanzas do polígono industrial, co que a consecuencia
foi que se fixou unha superficie de parcela de 38.233 metros cadrados e
unha edificabilidade de 177.905 metros cúbicos, respectivamente.
Extralimitación
Tamén se infrinxiron, di logo, a ordenanza que
regula os usos do inmoble, porque non se permitía a utilización do
edificio «para usos recreativos e de espectáculo e construíuse unha
boleira, salas de xogo e cines». Aínda por riba, apunta máis adiante a
fiscal, cunha extralimitación nas alturas fixadas en 12 metros, pero que
unha vez o complexo terminado, alcanza nunha parte do edificio os 17,20
metros e os 14,70 metros noutra. Tampouco se debeu permitir a
construción do espazo baixo cuberta xa que debería ter comunicación coas
estancias da última planta do hotel. «Na realización da infraestrutura
urbanística nin sequera as obras axustáronse ao proxecto de urbanización
que xa de seu infrinxía o Plan Xeral existindo entre ambos unha
diferenza de 284 metros cadrados», porque no tramo final da avenida o
viario estréitase ata os 14,4 metros. Por iso imputa ao arquitecto un
delito contra a ordenación do territorio e pide que se lle impoñan penas
de multa de 18 meses a razón de 20 euros diarios e inhabilitación
especial como técnico municipal por oito anos e medio.
Link: VONLine
|
|