O Ano Santo non deixará pegada
Fecha Miércoles, 05 mayo a las 12:27:07
Tema PHP-Nuke
O Ano Santo non deixará pegada no municipio de Cedeira. Así, polo menos,
interpreta o concelleiro de Turismo, Alfredo del Río, o silencio ao que a
Sociedade Anónima de Xestión do Plan Xacobeo somete ao concello
cedeirense.
Esta falta de resposta leva ao representante do goberno local para
cuestións turísticas a recordar a vinculación que existe, e ninguén pon
en dúbida, entre o santuario de San Andrés de Teixido e a cultura
xacobea. Neste sentido, cabe recordar que a tradición popular sitúa en
cantiis moi próximos ao santuario a chegada do barco que trasladou os
restos de Santiago o Maior a terras galegas.
Alfredo del Río non admite como válida a política que desde o goberno da
Xunta leva á práctica con motivo do Ano Santo, á vista de que a maioría
das axudas chegan a concellos ou entidades situados ou relacionados con
aquelas rutas máis coñecidas ou frecuentadas, como poden ser o caso do
Camiño Francés ou Inglés, e á mesma cidade de Santiago.
No entanto, Diario de Ferrol puido saber que a Xunta, a través de
Patrimonio, licitará en cuestión de días o proxecto de reposición do
muro que, localizado nas inmediacións do santuario de San Andrés de
Teixido, deixa ao aire unhas dependencias situadas baixo un templo que
recibe a visita diaria daquelas persoas que prefiren cumprir co santo en
vida que facelo logo de morto, convertido en calquera animal.
O orzamento da intervención, a día de hoxe só aproximado, non superará
os 100.000 euros. Os traballos fortalecerán unhas estruturas vinculadas
ao templo e mellorarán, ademais do aspecto, a seguridade da zona que,
non só recibe a visita dos devotos, senón tamén a dos moitos turistas
que a inclúen no seu percorrido pola comarca de Ortegal. Desde o pasado
sábado tamén pode estar incluído dentro do itinerario o castelo da
Concepción, unha antiga construción defensiva que, situada á altura do
porto da vila de Cedeira, estará aberta ao público ata o día 15 do
próximo mes de outubro. Unha vez supervisado polos responsables
municipais, o fortín poderá ser visitado de mércores a sábado de 11.00 a
14.00 e de 16.00 a 20.00 horas, mentres que os domingos abrirá de 12.00
a 14.00 e de 16.00 a 20.00 horas, segundo deuse a coñecer desde a
concellaría de Turismo. Por outra banda, cabe recordar que o Concello de
Cedeira mantén a gratuidade da visita e configurou un programa para dar
a coñecer aos viaxeiros as riquezas que aínda hoxe conserva unha
fortificación moi característica e especial para o pobo cedeirense
Link: DFONLine
|
|