Prórroga de suspensión
Fecha Lunes, 03 mayo a las 12:53:20
Tema PHP-Nuke
O Diario Oficial de Galicia publica hoxe a ampliación da orde pola que
se prorroga a suspensión de novos desenvolvementos urbanísticos nos 500
metros de costa do territorio galego, despois de que Consello da Xunta
fora informado o pasado xoves no Consello da Xunta. Trátase dunha medida
cautelar, ata a aprobación inicial do Plan de Ordenación do Litoral de
Galicia. A paralización vixente –adoptada polo actual Goberno en maio de
2009 fundamentándose na Lei 6/2007 de 11 de maio de ordenación do
litoral de Galicia- establecía un prazo de suspensión que remata o
vindeiro 17 de maio de 2010.
A decisión de ampliación desta orde vén motivada polo acordo de
ampliar pola súa vez, o prazo inicial de audiencia aos concellos de dous
a tres meses para a emisión do informe de referencia, en resposta a
unha petición formulada polas administracións locais a través da FEGAMP.
Así, o período de consultas dos concellos ao Plan de Ordenación do
Litoral, que en principio remataba o 10 de abril, prolongouse outros 30
días.
A prórroga, que permitirá analizar con rigor as achegas dos
concellos para mellorar o documento inicial do POL, é unha medida
cautelar co fin de preservar calquera actividade de transformación da
súa realidade física e permitir unha maior e mellor participación dos
concellos do ámbito do litoral. Con esta ampliación mantense a
suspensión da tramitación e aprobación dos plans especiais de reforma
interior, plans parciais, plans de sectorización e instrumentos de
equidistribución que teñan por obxecto a transformación urbanística de
terreos situados na franxa dos 500 metros.Cómpre recordar que
esta suspensión será de aplicación en todos os municipios costeiros, nos
terreos clasificados como solo urbanizable, apto para urbanizar ou
rústico apto para o desenvolvemento urbanístico.
Tamén será aplicable
aos municipios costeiros con poboación inferior a 50.000 habitantes, nos
terreos clasificados como solo urbano non consolidado.
Instrumento
de ordenación territorial
O Plan do Litoral é un instrumento de
ordenación territorial que ten por obxecto establecer os principios e
normas xerais para a ordenación urbanística da zona litoral baseado en
criterios de perdurabilidade e sustentabilidade, así como a normativa
necesaria para garantir a conservación, protección e posta en valor das
zonas costeiras. Aspira, en definitiva , ao establecemento do marco
básico de referencia para a eficaz integración das políticas
territoriais e actuacións urbanísticas do noso litoral, garantindo a
conservación e protección dos seus ecosistemas.Tamén dá
cumprimento á obrigatoriedade de que os poderes públicos velen para que
no ámbito da súa competencia e da natureza de cada territorio se adopten
medidas específicas necesarias para a protección, xestión e ordenación
da paisaxe, e integrar a consideración da paisaxe nas políticas de
ordenamento territorial e urbanístico. A Xunta de Galicia busca, a
través deste plan unha óptima coordinación das actuacións territoriais e
urbanísticas entre as administracións que operan sobre o litoral e o
seu contorno terrestre. Para iso é imprescindible a colaboración dos
concellos sitos no ámbito de análise.Traballo de audiencia
Desde
o envío dunha enquisa a todos os concellos, co fin de coñecer a súa
problemática, ata o 23 de abril de 2010, recibíronse en audiencia os
equipos técnicos e alcaldes de 74 dos 84 concellos que están no ámbito
do Plan do Litoral, co obxectivo de explicar e resolver as dúbidas e
recibir as achegas correspondentes. Así mesmo, e en relación coas
estatísticas de consulta a través da web do Plan de Ordenación do
Litoral, a media de volume de descarga diaria relacionada co POL
situouse nos 10,28 GB. Desde o 1 de marzo ata o 27 de abril
rexistráronse máis de un millóns de accesos (1.342.627 accesos), polo
que os accesos diarios recollidos neste período se eleva a máis de
23.000.
Transparencia e información
Coa finalidade de
garantir a transparencia, eficacia e a eficiencia na xestión pública
leváronse a cabo reunións explicativas e técnicas de traballo dentro da
mesa do Diálogo Social, co Colexio de Arquitectos de Galicia (Xunta de
Goberno e Comisión de Ordenación do Territorio e Urbanismo), coa
Comisión de Ordenación do Territorio e Urbanismo do Colexio de
Enxeñeiros de Camiños Canais e Portos, nas delegacións do Colexio de
Arquitectos de Lugo, Ferrol, A Coruña, Santiago de Compostela,
Pontevedra e Vigo (reunións ás cales asistiron os arquitectos e
aparelladores e equipos técnicos de planeamento dos concellos), coa
Escola Técnica Superior de Arquitectura de Galicia e con diversas
asociacións empresariais e colectivos de ecoloxistas.
Link: XONLine
|
|