A entrada en vigor da nova Lei do Solo deixa sen data o PGOM
Fecha Miércoles, 21 abril a las 11:14:12
Tema PHP-Nuke
O tempo xogoulle unha mala pasada ao Concello de Cedeira. Así, os seus
responsables políticos ven con certo desánimo como a entrada en vigor da
modificada Lei do Solo -feito que ocorrerá hoxe coa publicación da mesma
no DOG- deixa, se non inservible, si moi tocado o Plan Xeral de
Ordenación Municipal. Este leva máis de sete meses "durmindo o soño dos
xustos", tal e como subliñou o rexedor municipal, o socialista José Luís
Vergara, á espera do ditame que daría lugar, a continuación, á
aprobación inicial do documento por parte da corporación municipal. Dado
que este trámite non foi posible, a normativa establece un retroceso ou
marcha atrás, en canto á tramitación do documento, para todos aqueles
municipios con PGOM en fase incipiente. Esta especie de castigo á casa
de saída tamén implica outras consecuencias. Á marxe da económica, e da
que o alcalde espera que a Xunta resarcirá ao Concello no sentido de que
asumirá os gastos que poidan derivarse destes reaxustes, tamén existen
outros efectos de tipo burocrático ou administrativo.
O Concello terá que achegar máis documentación, sobre todo, en relación a
certos aspectos do PGOM. Ademais, terá que aplicar cambios substanciais
con respecto á planimetría que inicialmente previra desenvolver, se non
en todos, si na inmensa maioría dos núcleos rurais. As novas
disposicións deixan sen efecto a recorrida fórmula dos núcleos de
expansión suxeitos ao desenvolvemento dos moitos lugares rurais que
existen afastados dos espazos urbanos de poboacións, como pode ser o
caso da vila de Cedeira.
Por todas estas cuestións, o que o equipo de Vergara previra ter
practicamente resolto dentro do presente mandato, non se prevé agora
para próximas datas. Estas expectativas fan que o Concello mire con
certo pesimismo uns anos nos que descenderá aínda máis se cabe o número
de licenzas de obras -un apartado que xa se viu moi tocado pola crise do
sector e que tamén está detrás dalgúns proxectos que se atopan a medio
facer-. A día de hoxe, e á espera de que o Concello poida ver aprobado o
Plan Xeral de Ordenación Municipal, o urbanismo no termo municipal de
Cedeira réxese por unha planimetría que está en vigor desde o ano 1995.
Vergara entende que esta xa non é válida para un municipio que trata de
crecer e desenvolverse.
Link: DFONLine
|
|