Rede de distribución de gas
Fecha Jueves, 15 abril a las 22:12:45
Tema PHP-Nuke
O xefe do Executivo galego, Alberto Núñez Feijóo, anunciou hoxe que o
seu Goberno prevé un investimento de 80 millóns de euros para
"desbloquear" a rede de distribución de gas e levar esta enerxía
"alternativa" a 30 localidades galegas.
Tras presidir a reunión semanal do seu Goberno, ratificou a
aprobación do decreto polo que se regula o trámite de competencia e os
criterios de valoración no suposto de concorrencia de dúas ou máis
solicitudes de autorización administrativa de instalacións de transporte
secundario e distribución de gas natural e redes de distribución de
GLP.
Segundo explicou, este decreto, o "primeiro" das súas características
que se desenvolve en España, situará a Galicia "á vangarda" xa que
"desbloquea de forma definitiva" o desenvolvemento da rede de
distribución de gas, dotándoa de "maior amplitude, modernidade e
eficiencia".
Na liña, Feijóo congratulouse por "superar a parálise" do bipartito e
retomar o desenvolvemento desta rede de distribución de gas, que
permitirá "mellorar a competitividade" empresarial e a "calidade de
vida" dos cidadáns dunha trintena de localidades galegas, entre as que
incluíu A Estrada, A Guarda, Lalín e O Grove --en Pontevedra--, Ares,
Cedeira, Melide e Mugardos --na Coruña--, O Barco, Verín e Xinzo de
Limia --en Ourense--, e Burela, Foz, Monforte, Sarria e Viveiro --en
Lugo--.
O decreto elaborado pola Consellería de Economía regula o trámite de
competencia e os criterios de valoración que se van a ter en conta no
suposto de concorrencia de solicitudes de autorización administrativa de
instalacións de transporte secundario e distribución de gas natural e
redes de distribución de GLP.
CRITERIOS DE VALORACIÓN
Entre os criterios de valoración para gasodutos de transporte
secundario e ramais de distribución de gas natural, que son os que
conectan coas redes de distribución nos núcleos de poboación, destacan
os de ser titular de autorizacións administrativas, precisamente, das
redes de distribución ás que se vaian conectar, a "idoneidade" do
trazado, as características técnicas do proxecto, o prazo de execución e
o orzamento.
Para as redes de distribución de gas natural, que son as que están
nos núcleos de poboación, valorarase ser titular de autorizacións
administrativas de redes de distribución en localidades "próximas", o
prazo de inicio da suministración, a extensión da rede, o orzamento e a
solución técnica adoptada, entre outros.
En canto os criterios para as redes de distribución de GLP, que
deberán deseñarse e construírse de forma que resulten "compatibles" para
a distribución do gas natural, valorarase que sexan titular de
autorizacións administrativas de redes de distribución de GLP en núcleos
de poboación próximos, o prazo de inicio de suministración, a extensión
da rede, o orzamento e a solución técnica adoptada.
Link: EPONLine
|
|