“Hai que refundar o BNG” - X.M. Beiras
Fecha Miércoles, 04 marzo a las 15:18:13 Tema PHP-Nuke
Xosé Manuel Beiras falou alto este mércores en Compostela. Tres días
despois da morte electoral do bipartito, o histórico líder nacionalista
compareceu diante dos medios de comunicación canda os outros catro
“irmandiños” que tamén están no Consello Nacional do BNG: Martiño
Noriega, Xosé Constenla, Cristina Amor e Concha Trigo. A mesaxe non
podía ser máis diáfana: O Bloque ten que iniciar de inmediato un
proceso de refundación.
Nunha análise de máis de media hora,
Beiras debullou as tres medidas que exixe o Encontro Irmandiño para
salvar a grave crise que se aveciña no BNG. A primeira delas pasa pola
dimisión urxente de toda a Executiva Nacional: “Hai que poñer os cargos
a disposición. É un exercicio de saúde democrática indispensábel”. A
segunda proposta urxente é proceder á autocrítica: “Non se pode
continuar o método de atribuir sempre as perdas de electorado a causas
externas”. A terceira é pedirlle escusas aos movementos sociais “por
terlle dado as portas” e abrirlle as portas do BNG.
Beiras deixou claro que a solución pasa por crear unha xestora que sexa
a encargada de preparar unha Asemblea Nacional ordinaria urxente: “Non
se pode agardar ao outono”. A falta de medidas rápidas “só fai aumentar
o descrédito social e público da dirección, que é unha causa primordial
do fracaso electoral”. Outra condición innegociábel para deter a crise
é que a asemblea sexa aberta a toda a militancia e non só por
delegados, como ocorreu na cita do ano pasado: “Hai que recuperar a
democracia básica, o que está restaurado en toda a esquerda cívica a
nivel mundial”
Os “irmandiños” aseguran que non queren
capitalizar a “refundación”. Pola contra, subliñan que é fundamental
tenderlle a man a parte do mundo nacionalista e da esquerda que se
afastou nos últimos anos do Bloque.
“Non queremos pirámides verticais” Sen
chegar a nomealos en ningún momento, Beiras cargou contra a liña
marcada pola UPG e o “quintanismo”: “O mesmo aparato vertical non pode
pilotar a asemblea, sería unha fraude á militancia. Chamamos a toda a
militancia a recuperar o exercicio libérrimo de reflexionar. Non
queremos pirámides verticais”.
A solución, segundo os
irmandiños, pasaría por manter a estrutura de frente política
interclasista coa participación activa e decisiva dos militantes no día
a día. Para Beiras, o BNG fracasa intentando copiar o modelo dos outros
partidos. Neste sentido, sinalou que os conservadores volveron ao poder
en só catro anos pola falta de proxecto do nacionalismo e non por
méritos propios: “O goberno acabou sendo un fin en si mesmo”,
sentenzou. Beiras laiuse pola volta a San Caetano do PPdeG (“por non
chamarlle a santa mafia”, asegurou). Prognosticou tempos moi duros e
pediu un esforzo de todo movemento nacionalista para non incorrer nos
“graves erros” dos últimos anos.
Link: VIONLine
|
|