Novo impulso cidadán a prol do futuro do naval
Fecha Sábado, 27 marzo a las 10:56:55
Tema PHP-Nuke
"En defensa do emprego. Por un sector naval con futuro. Levantamento do
veto xa". Son lemas unha vez máis da plataforma Rumbo 21, que este sábado convoca
en Ferrolterra unha mobilización que ten a súa principal reivindicación
no levantamento do veto á construción naval civil na vella Astano.
 © 2010 Vieiros
Rumbo 21 xunta a colectivos sociais diversos, sindicatos, formacións
políticas e empresariais en defensa do emprego no sector naval na
comarca de Ferrolterra. En datas recentes, a plataforma xa fora quen de
xuntar perto de 20 mil sinaturas para a promoción dunha Iniciativa
Lexislativa Popular (ILP) coa que convidar o Parlamento a aprobar unha
declaración para instar o goberno español a renegociar coa Unión Europea
o veto á construción naval civil.
Promesas incmpridas
A propia parálise da tramitación da ILP en favor do naval e o
incmprimento por parte do goberno español da promesa de negociar o
levantamento do veto aproveitando a presidencia de quenda na UE, son
dúas das reclamacións que están presentes na mobilización deste sábado.
Durante a presentación da manifestación deste sábado Xesús
Varela, voceiro de Rumbo 21, asegurou que "se está a mentir
descaradamente", e recordou que ningún dos actos programados polo
goberno español durante a presidencia europea estará dedicado ao sector
naval. Outro integrante da asociación, Ramón Yáñez, manifestou que
"Ferrol está a xogar o seu futuro", malia que "o sector naval non será
importante para o ministro de Industria". Varela advertiu de que o
vindeiro ano, nos meses de verán, comezarán a producirse "regulacións"
nas empresas auxiliares do naval, pola falta de novos contratos no eido
da construción militar. Por outra parte, desde Rumbo 21 saen ao paso de
recentes polémicas asegurando que non promoven nin defenden a
privatización do estaleiro de Navantia Fene e insisten en que reclaman o
seu uso para a construción civil vista a súa actual infrautilización.
O estaleiro de Fene ten vetada a construción naval civil até
2015 por un compromiso adquirido polo Estado Español con Bruxelas en
2005, que lle evitou devolverlle a Europa 1.342 millóns de euros
achegados polo goberno de Aznar a apoiar o sector naval e que se
declararon ilegais.
A manifestación sae ás 12 horas do
peirao de Curuxeiras, en Ferrol, e rematará coa lectura dun manifesto
por parte do escritor e xornalista Manuel Rivas.
Link: VIONLine
|
|