O actual alcalde de Narón, Xosé Manuel Blanco, será
novamente o candidato á Alcaldía de Narón. Así se determinou nunha
asemblea celebrada hai uns días polo equipo de Terra Galega, no que se presentou
unicamente a mencionada proposta. O nomeamento refrendarase nunha nova
reunión que TEGA fixou
para o vindeiro día 9 e que terá lugar no local que a agrupación ten no
barrio da Solaina.
Tras acceder á Alcaldía de Narón, en xaneiro de 2009, Blanco anunciou a
súa intención de presentarse á reelección polo partido que actualmente
encabeza en Narón. Tralo seu desembarco na política local, no ano 1983 e
da man das listas de ANGN, encabezadas por Antonio Martínez Aneiros -e
nas que tamén estaba, como número dous, Xoán Gato- Blanco
asumiu diferentes concellerías e enfrontarase no 2011 ás súas primeiras
eleccións como cabeza de lista de TEGA
A principios do pasado mes de febreiro Terra
Galega convocou en Santiago de Compostela aos
integrantes da Dirección Nacional do partido. A reunión fixouse para
abordar diferentes cuestións políticas e tamén o asunto das próximas
eleccións municipais. Unha vez que se oficialice o nomeamento de Xosé
Manuel Blanco como candidato á Alcaldía, procederase a dar a
coñecer ao resto de candidatos da comarca, tal e como se indicou desde TEGA.
Finalmente o Consello Nacional do
partido terá que dar o visto bo ás listas.
A agrupación mantén na comarca, ademáis da de Narón, as alcaldías de
Valdoviño, con Isabel Álvarez, e Neda, con Ignacio Cabezón.
Link: +GaliciaOnLine