A
plataforma cidadá mantivo este mediodía un encontro con Simone Klinge,
do secretariado do Consello de Europa para a Carta europea das linguas
rexionais ou minoritarias
Santiago de Compostela,
23 de febreiro de 2010.- Unha representación da Plataforma cidadá
Queremos Galego mantivo este mediodía no Hostal dos Reis Católicos de
Santiago de Compostela un encontro con Simone Klinge, integrante do
secretariado do Consello de Europa para a Carta europea das linguas
rexionais ou minoritarias (CELRM), aproveitando a súa presenza en
Galiza.
A delegación de Queremos Galego, encabezada polo
Presidente da Mesa pola Normalización Lingüística, Carlos Callón,
entregou á representante europea un breve informe no que se indican os
principais incmprimentos por parte do actual goberno da Xunta de
Galiza do dito tratado internacional, asinado polo Estado español e
ratificado polas Cortes en 2001, sendo presidente do goberno José María
Aznar e tendo o Partido Popular maioría absoluta en ambas as cámaras.
No
informe achegado, que será completado con outro máis extenso nun futuro
próximo, faise especial fincapé na “máis que preocupante” situación de
“desprotección” na que quedaría o galego no ámbito do ensino, caso de
aprobarse o formulado nas chamadas Bases para a elaboración dun decreto
de plurilingüismo presentadas o pasado 30 de decembro polo propio
Presidente da Xunta, Alberto Núñez Feijóo. Unhas “bases” que, como
Queremos Galego e as diferentes organizacións que a integran xa
advertiran, van en contra dos compromisos estabelecidos na Carta
europea.
Exemplo “significativo” do ámbito educativo para
Queremos Galego do “retroceso” que está a padecer a política
lingüística desde a chegada de Alberto Núñez Feijóo ao goberno é o
“desmantelamento” das rede infantil de galescolas, un modelo que tal e
como recordou Carlos Callón “recibira os eloxios do Comité de Expertos
do Consello de Europa” no informe sobre a aplicación da Carta de 2008.
O
docmento achegado a Simone Klinge inclúe tamén apartados referidos a
ámbitos como a xustiza, os medios de comunicación, as autoridades
administrativas e servizos públicos ou a vida económica e social.
Malia
a avaliación negativa emitida polo Comité de Expertos nos seus informes
sobre o grao de aplicación da Carta no Estado e en Galiza, tanto en
2005 como en 2008, Queremos Galego sinalou que neste tempo “non se fixo
nada ou case nada” por avanzar cara aos obxectivos comprendidos no
tratado internacional ou mesmo houbo, como no caso da Función pública
ou os medios de comunicación públicos, “retrocesos importantes”, como a
eliminación do artigo 35 da Lei da Función Pública en xuño de 2009 e,
con el, a parte específica en galego nas probas de acceso laboral ás
administracións.
Tendo en conta a actual situación, “hai
poucas dúbidas de que o próximo informe a presentar polo Comité de
Expertos será con diferenza o máis crítico” sobre a situación do galego
e o grao de aplicación da CELRM, dixo Carlos Callón, quen recordou que
o dito Comité do Consello de Europa “sempre tivo en conta a opinión dos
colectivos sociais en defensa do galego” e as súas achegas.
Por
súa parte, a representante do secretariado do Consello de Europa para a
Carta europea agradeceu a posibilidade de reunirse e escoitar a voz de
colectivos sociais e cívicos como Queremos Galego e indicou que a
partir de abril o Comité de Expertos voltará para continuar co proceso
de elaboración do terceiro informe sobre o grao de aplicación da Carta
europea.
Siomone Klinge recordou que os diferentes estados
subscritores da CELRM puideron ter escollido diferentes niveis no seu
grao de aplicación, escollendo o Estado español no seu día o nivel
máximo. “A ratificación polos parlamentos dos estados implica a obriga
legal do seu cmprimento”, afirmou.
Fernando Iglesias Bouza.
(Responsables comarcal da Mesa pola normalización lingüística
e membro da Pataforma Queremos Galego!).