Prórroga da lei dos 500 metros no litoral
Fecha Jueves, 14 mayo a las 20:23:18
Tema PHP-Nuke
A Consellaría de Medio Ambiente, Territorio e Infraestruturas renovou
este xoves a promesa de ter na mesa antes de que acabe o ano un Plan de
Ordenación do Litoral. Mentres, o departamento que pilota o conselleiro
Agustín Hernández comunica oficialmente que se prorroga a suspensión de
novos desenvolvementos urbanísticos nos 500 metros de costa do
territorio. A decisión chegou nesta xornada ao Consello da Xunta,
subliñándose o carácter "cautelar" da medida, que estende a
paralización da construción fixada polo anterior Goberno, cuxa vixencia
finalizaba este domingo 17 de maio.
"O crecemento urbano segue a ser necesario, pero debe responder a un
modelo de desenvolvemento equilibrado e sostíbel", expón a consellaría
nun comunicado, asegurando que ten como obxectivo lexislar para evitar
"unha radical transformación do territorio e a paisaxe litoral, sinal
de identidade de Galiza". "A falta de adaptación do planeamento á
lexislación vixente resulta especialmente grave na zona costeira dado o
valor do litoral como recurso natural e ambiental non renovábel",
admite a consellaría.
Aproveitarán o traballo feito
O novo equipo da Consellaría de Infraestruturas sinala que o anterior
executivo realizou "unha serie de estudos e análises así como unha
primeira identificación das súas presións e ameazas". Con todo,
advirten que estes docmentos "que aínda se encontran en fase de
desenvolvemento, non constitúen aínda un docmento do Plan de
ordenación do litoral".
De todas formas, valoran a análise
de máis dun milleiro de ámbitos de solo clasificado como urbano non
consolidado, urbanizábel delimitado e urbanizábel non delimitado ou
rústico apto para urbanizar. Apuntan ao fío que os estudos realizados
puxeron de manifesto que 106 destes solos encóntranse en contacto
directo coa ribeira do mar, 180 sobre ou en contacto coa zona de
servidume de protección, 324 entre a servidume de protección de 200
metros, e 287 na franxa entre os 200 e 500 metros, o resto (345)
atópanse en zonas máis alá dos 500 metros.
"Queda patente o
feito de que as dinámicas de asentamento e as tipoloxías dos modos de
crecemento, así como os desenvolvementos urbanísticos nas últimas
décadas nos municipios obxecto do Plan de ordenación están supoñendo
unha forte transformación do modelo tradicional de asentamento da
poboación en Galiza", interpretan. "A tendencia demostra un constante
crecemento urbano renunciando á rexeneración dos tecidos urbanos
consolidados e orixinando fortes transformacións morfotipolóxicas",
recolle o informe que chega ao Consello da Xunta.
Link: VIONLine
|
|