Os eurodeputados non queren que se saiba do seu absentismo
Polémica polas presións a unha web, temporalmente pechada, que peneira a actividade dos deputados no Parlamento Europeo.
En abril de 2008 chegaba a debate no Parlamento Europeo o asunto da
crise alimentaria mundial e a súa relación co aumento dos prezos e as
políticas relacionadas cos biocombustíbeis. Paradoxalmente, nun momento
de máxima actualidade do problema da fame no mundo, transcendía a imaxe
dunha Eurocámara practicamente baleira nesa xornada.
Exemplos como ese do absentismo dos eurodeputados son dos que bota man o espazo web Parlorama.eu,
que axitou recentemente a actualidade da vida na Cámara debido á
clasificación que realizou en función da actividade dos parlamentarios.
A comparativa non caeu a gusto dos afectados, especialmente dos peor
clasificados, en plena carreira electoral cara a cita coas urnas o
próximo 6 de xuño. O responsábel da iniciativa, Flavien Deltort,
defende en conversa con EUdebate
que a idea vai en favor da "transparencia" e recorda que "canto máis
transparente é a política, máis se interesan nela os cidadáns". "Os
políticos non desexan que os electores os avalíen, e hai moita
información sobre o seu traballo que non está dispoñíbel ao público",
advirte.
Co espazo Parlorama.eu aínda pechado, convidámolos
a seguir noutra web, Votewatch.eu, a actividade dos eurodeputados
galegos, ou definidos como galegos polos seus partidos, tal e como é o
caso da filla do ex presidente Manuel Fraga: Carmen Fraga (PP); Daniel Varela (PP) (deixou recentemente o Europarlamento para ocupar escano no Hórreo); Francisco Millán Mon; Antolín Sánchez Presedo; Rosa Miguélez.
Lnk: VIONLine