Desde Anova queremos sumarnos a estes dous sentimentos existentes entre boa parte da opinión pública local ao ter coñecemento da última "pirueta" antidemocrática do noso goberno municipal na reunión plenaria do pasado 25 de marzo. Resumindo : entre outros puntos da ORDE DO DÍA figuraba a posibilidade de subvencionar con máis de dezaoito mil euros (18.000 €)á comisión organizadora das festas patronais de 2014, por un suposto déficit por esa cuantía.

Ata aquí podería ser máis ou menos discutible pois entendemos que non hai ningún regulamento que marque as relacións entre o concello e as sucesivas comisións de festas. O que produce auténtico escándalo é que non hai xustificante documental de ningún tipo, que o señor que presidía dita comisión parece ser que vai figurar na lista do PP local ás próximas eleccións do 24 de maio e que se toma esa medida en contra da opinión do interventor municipal (como en tantas outras ocasións), funcionario encargado de fiscalizar as contas e que coñece as leis á perfección.

 E para mais "inri", despois das críticas da oposición local na sesión plenaria, non se molestan nin sequera en rebatelas ou tratar de xustificarse.

Simplemente o alcalde pide que se vote e os seus monaguillos fano sen rechistar e a favor da medida. Diante de feitos coma este só cabe preguntarse : É que hai unha "casta" que se pode saltar alegremente as leis? O ministerio fiscal non pode actuar de oficio ao ter coñecemento destas tropelías?

Cidadáns de ben de Cedeira : pensen moi ben se co seu voto queren ser cómplices de semellante abuso.