Nos orzamentos da Xunta de Galicia para ao ano 2013 non aparece consignada a partida do 50% comprometida pola Xunta de Galicia no convenio que esta rubricou o pasado ano co Ministerio de Agricultura, para construir en Cedeira un Centro de Saúde.

O valor total de este edificio, financiado a partes iguais entre Madrid e Santiago, acadaba un total de 2,5 millóns de euros e supoñía o incremento de novas dependencias e novos servicios recoñecidos pola propia Xunta de Galicia.

En repetidas ocasións, ao longo do pasado ano, o Grupo Socialista do Concello de Cedeira, levou a Pleno, mediante mocións, rogos e preguntas a necesidade de dar pasos inequívocos para construir o Centro de Saúde.

Ainda que formalmente os populares afirmaban estar polo labor de que os 2,5 millóns de euros se invertisen en Cedeira nun novo centro de saúde, o PP deixou durmir no sono dos xustos este impresionante proxecto que incorporaba novos servicios como os de Rehabilitación e Fisioterapia dos que a dia de hoxe carecemos.

Naqueles momentos xa puxemos de manifesto que coa disculpa de buscar unha ubicación distinta á proporcionada polo grupo de goberno presidido polos socialistas  o goberno de Rubido escondía as poucas ganas de facer realidade outro proxecto elaborado polo equipo de goberno anterior.

Fixo o mesmo frustrando o viveiro de empresas ou renunciando á mellora enerxética do palacete municipal.

Agora o resultado é o que anunciabamos, que a displicencia ante este fermoso proxecto podía traer como consecuencia o abandono do mesmo por parte das autoridades de Santiago.

En xusta lóxica, se nosoutros non amosamos interés pola súa realización, menos van ter eles, para quenes Cedeira solo é interesante en momentos electorais. Recordemos o prometido a respecto da estrada AC-566, Ferrol-Cedeira hoxe en estado calamitoso.

JOSÉ LUIS VERGARA REY

GRUPO SOCIALISTA

CONCELLO DE CEDEIRA