Concello - Enerxías alternativas
Fecha Miércoles, 30 mayo a las 08:52:35
Tema PHP-Nuke
Na súa aposta por incorporar o uso das enerxías alternativas aos
edificios públicos, o Concello de Cedeira porá en marcha dous proxectos
que se executarán no pavillón polideportivo e na escola infantil. O
concelleiro de Urbanismo, Luís Rubido, explicou que no primeiro caso o
Concello instalará paneis -uns 36- de enerxía solar térmica para
producir a auga quente necesaria para a piscina climatizada. Desta forma
reducirase considerablemente, un 30%, segundo as cifras que manexa o
Concello, o consumo de gas propano que actualmente se emprega como
combustible nas instalacións deportivas.
No caso da gardería municipal, a intervención consistirá na substitución
da caldeira de gasóleo por outra de biomasa no edificio que alberga
este servizo. Neste caso o aforro enerxético sitúase en torno ao 60%.
Nesta intervención tamén se contempla unha posible ampliación das
instalacións, de maneira que cando esta leve a cabo, a infraestrutura
establecida garanta o servizo de calefacción sen necesidade de obras
futuras.
O edil Luís Rubido sinalou que estas actuacións, orzadas en preto de
80.000 euros, financiaranse con cargo á subvención que o Concello de
Cedeira recibirá da Xunta de Galicia ao amparo do Fondo de Compensación
Ambiental. Un fondo que destina diñeiro a actuacións encamiñadas a
impulsar a eficiencia enerxética ou o uso das enerxías renovables
naqueles municipios afectados pola instalación de aeroxeradores ou liñas
de conexión, como é o caso da vila. Ambos os proxectos, xa redactados e
aprobados, están á espera de que se contraten as obras, tal e como
avanzou Luís Rubido, cuxo prazo de execución é de tres meses.
Segundo sinalou o responsable de obras, a implantación paulatina das
enerxías alternativas no día a día da administración local é un
obxectivo estratéxico para o goberno de Leopoldo Rubido. A finalidade
destas actuacións non é outra que a redución do gasto corrente que xera o
consumo enerxético nas instalacións municipais, así como contribuír á
conservación dos recursos naturais.
Nesta implicación por promover o uso das enerxías limpas, o Concello
traballa, como xa se avanzou fai un mes, na organización dunha feira de
enerxías renovables, que posiblemente, celebrarase o próximo mes de
novembro no polígono industrial da Trabe. O obxectivo é lograr a
presenza de firmas empresariais de todo o territorio nacional, que
contarían cunha caseta propia, para dar a coñecer os equipos que
comercializan e facilitar así a implantación de enerxías alternativas no
ámbito doméstico.
De forma previa, a vila cedeirense acollerá un encontro de expertos na
materia procedentes de toda España que terá lugar no Palacete Municipal
no próximo mes de agosto co fin de intercambiar experiencias e puntos de
vista.
Link: DFONLine
|
|