Concello de Cedeira - Porto Deportivo
Fecha Jueves, 09 febrero a las 11:07:50
Tema PHP-Nuke
Tras declararse deserto o concurso público convocado a principios de
2011 para a construción do porto deportivo de Cedeira, Portos de Galicia
iniciou un período de consultas a diferentes empresas do sector de face
a coñecer as súas necesidades e intereses neste proxecto,
características que, na medida do posible, intentarán incorporar ao
prego de condicións da intervención.
Este procedemento está encamiñado a garantir a concorrencia de
iniciativas ao futuro concurso público que o ente galego convocaría, en
caso de existir interese por parte das empresas. "Agora mesmo Portos de
Galicia só sacará adiante aqueles proxectos que estean avalados pola
iniciativa empresarial", indican desde o organismo autonómico. Unha
filosofía coa que pretenden evitar situacións como a do porto deportivo
de Muxía, construído durante a pasada lexislatura e "en cuxa xestión
agora non está interesada ningunha empresa", indican.
Estas instalacións náuticas de recreo son unha demanda histórica da vila
de Cedeira. No ano 2005 deuse a coñecer o proxecto para construír na
zona unha nova dársena deportiva, unha proposta que se atopou coa
oposición frontal da Confraría da localidade ante as condicións
expostas, por entender que as pretensións da UTE que resultou
adxudicataria dos traballos eran excesivas.
Así, o proxecto inicial contemplaba dotar á infraestrutura de 411 puntos
de amarre, demasiados para unha ría de apenas un quilómetro de ancho.
As alegacións presentadas polo depósito local, o goberno municipal,
entidades ecoloxistas e usuarios das instalacións náuticas obrigaron a
redactar de novo o proxecto reducindo o número de puntos de amarre ata
os 270. Entre tanto, a UTE que debía acometer os traballos decidiu
renunciar ao proxecto ao non estar conforme co mesmo.
Foi entón, a comezos de 2011, cando Portos sacou a iniciativa a un
concurso que quedou deserto. De aí a sondaxe actual para coñecer as
necesidades dos posibles "pretendentes" do proxecto de face a incluílas
na redacción do novo prego.
Link: DFONLine
|
|