Os efectos do Klaus seguen rexistrándose dous meses despois do seu paso
Fecha Miércoles, 01 abril a las 12:32:41
Tema PHP-Nuke
As consecuencias do temporal que azoutou a comarca o pasado 23 de
xaneiro perviven aínda cando xa transcorreron máis de dous meses desde
que ?Klaus? tocou a costa galega. Así, á multitude de árbores que aínda
permanecen derrubados nos montes da comarca, sobre todo nos lugares
máis castigados como Agarimo, Cedeira e Ortigueira, ademais doutros
municipios da zona de Trasancos, hai que sumar outros efectos que se
fixeron sentir, sobre todo, nos petos de todos os cidadáns, que se
viron na necesidade de acometer reparacións varias tras os danos
ocasionados polo furacán.
A localidade de Cedeira, sobre todo a zona rural, resultou unha das
máis castigadas da comarca, xa que nas súas costas rexistráronse
refachos que superaron os 180 quilómetros por hora. Ademais dos graves
danos ocasionados na superficie forestal, moitos veciños da vila
quedaron sen subministración eléctrica durante varios días, ou semanas,
nalgún caso.
Precisamente unha destas persoas, María Jesús García Fraguela, veciña
da parroquia de San Román, denunciou en reiteradas ocasións que o paso
do temporal danou o contador da súa vivenda, pois non se explica de
ningún outro modo que as lecturas do aparello pasasen dos 200
quilowatts, que viña pagando habitualmente, aos 4.118 aos que debe
facer fronte agora nunha das facturas remitidas pola compañía Fenosa,
que ascende a 657,27 euros, unha cantidade á que esta veciña afirma non
poder facerse cargo. "Eu non dispoño desta cantidade agora, e o peor é
que a próxima factura virá na mesma liña que esta, pois o contador
desde ese día vai moito máis rápido do que o facía antes", asegura.
Antes de denunciar os feitos á compañía, María Jesús contratou os
servizos de varios técnicos para que supervisasen se algún
electrodoméstico en mal estado puidese ocasionar este incremento na
factura da subministración eléctrica, xa que a diferenza doutras casas
o gasto en corrente deste domicilio da zona rural é moi baixo, xa que
só a cociña é eléctrica e o sistema de calefacción cínguese a unha
cociña de leña.
Desde a compañía, en cambio, garantíronlle que xa se pasaron a revisar
o contador, mentres que a afectada denuncia que iso nunca ocorreu.
Link: DFONLine
|
|