Concello de Cedeira - FESTAS
Fecha Miércoles, 24 agosto a las 08:44:38 Tema PHP-Nuke
Tras unha semana de festas en Cedeira, o Concello anuncia que xa está
estudando a posibilidade de crear un padroado que organice a celebración
do próximo ano.
E é que as festas cedeirenses estiveron marcadas pola
débeda contraída pola comisión que organizou os festexos o ano pasado e o
intento do anterior goberno local de sacar a concurso a organización
das actividades e concertos.
Aínda que desde o Concello non se aventuran a dar ningunha cifra de
asistencia, estiman que durante o concerto dos Segredos, día grande das
festas, ao redor de oito mil persoas visitaron a vila.
O investimento foi menor que en anos anteriores. A administración local
destinou preto de oitenta mil euros e recadou ao redor de trinta mil de
doazóns de veciños, comercios e locais hostaleiros. «Gastámonos case
catro veces menos que en anos anteriores», destacaba o edil de Turismo,
Luís Rubido. Ademais, o concelleiro fai balance do movemento económico
que se xerou durante as últimas semanas que cifra en 500.000 euros.
Coa idea de crear un padroado, o goberno local busca paliar os problemas
que se xeraron coa organización dos festexos durante as últimas
edicións. «Queremos que sexa unha institución permanente que poida
recibir financiamento e actuar de forma autónoma», explica Rubido.
Por outra banda, o concelleiro de Turismo asegura que o Concello non se
reunirá cos dirixentes da comisión de festas do ano pasado (que deben
cincuenta mil euros a artistas e traballadores) ata mediados de
setembro. «Teremos que estudar as súas alegacións e ata debater o
problema en pleno para ver se se toma algunha decisión», sentencia o
concelleiro.
Link: VONLine
|
|