Robaleira
Fecha Martes, 02 agosto a las 12:52:11 Tema PHP-Nuke
Robaleira, vinte anos logo da súa primeira -e única- participación na
Liga Galega de Bandas de gaitas (LGBBGG), volveu triunfar. A formación
gaiteira cedeirense obtivo o primeiro posto na segunda división -en 1991
só había unha, e gañaron- do campionato celebrado este domingo en
Vilalba, mostrando o seu repertorio e son que a fai ser diferente ás
demais.
Antonio Rodríguez Bustabad é o director da banda, e único dos fundadores
que se mantén no grupo desde fai xa 26 anos. «Decidimos volver competir
porque o formato cambiou», narra Rodríguez. «Agora é máis aberto e
podemos aplicar o noso estilo».
Pero, que fai a Robaleira diferente das demais formacións? O director
teno moi claro. «O noso son fainos distintos e claramente reconocibles»,
afirma Rodríguez. Engade que os arranxos, o intentar harmonizar e facer
as cancións distintas ao orixinal, tamén son moi valorados polo xurado.
E nisto Robaleira tamén destaca pola súa calidade.
Boa parte da culpa dese son especial téñeno tamén os tambores. A banda, a
diferenza da maioría de participantes que usan percusión escocesa, fan
un son que respecta a tradición galega. Rosario, irmá de Antonio, é a
encargada de percusión e unha das artífices da formación. «Intento que a
base sexa de percusión tradicional de aquí», explica Rosario.
A boa formación musical impartida na escola cedeirense é outro dos
fundamentos de Robaleira. Anxo Díaz, de 20 anos, man dereita do
director, leva tocando a gaita desde os 8. «Sabiamos que tiñamos
posibilidades porque temos arranxos complicados que o xurado valora
moito», di confiado o gaiteiro. Cristina González, percusionista desde
os 7 anos, e da idade de Anxo, subliña de novo o son distinto de
Robaleira. «E a vestimenta, que tamén vai acorde co folclore galego»,
engade a moza.
O premio por gañar o domingo? Ascender a Primeira División, un bonito
trofeo e 1.800 euros que irán destinados a material para a banda, «e
para unha cea de celebración», apunta cun sorriso Antonio Rodríguez.
Link: VONLine
|
|