Receita para o novo escenario político
Fecha Lunes, 30 marzo a las 16:45:20
Tema PHP-Nuke
Transmitir cara a cidadanía "visión de alternativa" é en opinión de
quen foi voceiro parlamentario do BNG durante a última lexislatura,
Carlos Aymerich, unha prioridade da que deberan ser conscientes
nacionalistas e socialistas de agora en diante. Na opinión do deputado
electo do BNG pola Coruña, os excesos competidores entre as dúas forzas
foron un "desacerto fundamental" da etapa de goberno que agora se
pecha. Nesa liña, e durante unha entrevista para a Radio Galega,
Aymerich destacou a necesidade de que socialistas e nacionalistas
afinen esa colaboración nas institucións onde gobernan en coalición.
Por outra parte, Aymerich agoirou que, á luz das recentes declaracións,
o PP ameaza actuar no Goberno como unha "brigada de demolición" de
políticas públicas, e censurou as afirmacións realizadas polos populares
ao respecto do sistema de servizos sociais, concurso eólico ou decreto
do galego no ensino. Foi así como acusou o PPdeG de "facer da negación
de Galiza como realidade diferencial ou da mentira lingüística unha das
súas bandeiras" e prognosticou unha lexislatura "dura".
Ao
fío, amosou non estar satisfeito pola elección do PP para a presidencia
do Parlamento, e analizou que os "antecedentes" da deputada proposta
para o posto, a pontevedresa Pilar Rojo, "non son tranquilizadores".
Recordou o deputado nacionalista que na anterior etapa do PP con
maioría absoluta, impuxéronse "métodos contrarios ao regulamento da
Cámara e aos dereitos fundamentais dos deputados". Nesa liña, avanzou
que hai moito por corrixir no funcionamento da institución.
Optimismo sobre o futuro do BNG
"Serán os órganos de dirección do BNG os que decidan o papel de cada
un", explicou doutra banda Carlos Aymerich, sen confirmar se repetirá
como voceiro do grupo do BNG no Parlamento ou mesmo se poderá ser
designado novo voceiro nacional da formación política. Na súa opinión é
momento de falar "do colectivo, máis que de persoas concretas". Nesa
liña, apelou ao "espírito" da recente xuntanza na que a executiva do
Bloque anunciaba a súa dimisión e dixo esperar que o "afán de
colaboración" amosado nesa xornada guíe un proceso que leve a unha
asemblea cunha "candidatura unitaria" o próximo 10 de marzo. "Sería bo
dicirlle á militancia que esa é a nosa vontade: camiñar como unha
formación unitaria, aínda que moi plural por dentro", afirmou,
confiando en que o resultado desa cita sirva para que "todos poidan
sentirse cómodos".
Link: VIONLine
|
|