SEÑOR - Por Vicente Araguas
Fecha Martes, 14 junio a las 19:10:28
Tema PHP-Nuke
Un artigo de opinión de Vicente Araguas publicado no xornal Diario de Ferrol.
"
Despois de ler a entrevista (espléndida, asinada por Montse Fernández),
con Xosé Luis Vergara, alcalde saínte de Cedeira, que publica o noso
DIARIO DE FERROL o 5 de xuño, soamente direi: “¡Que maneira de perder!”
Parafrasando a Joaquín Sabina, cando escribirá o himno non oficial do
Aleti (de Madrid). E é que hai que ser moi señor para analizar polo
miúdo unha derrota electoral que
non foi desfeita, encaixándoa coa nobreza que pon este profesor de
altura, intelectual de peso, e home honesto como hai poucos na balanza
(ás veces romana, polo rústicos que semellan algúns) dos políticos
actuais. E abondaríame ter escoitado a Vergara, tiven a sorte de estar
alí ese día, cando se inaugurara o monolito a Leslie Howard n´A
Capelada.
Daquela Vergara ceibou ao aire atlántico unha proclama
ilustrada, onde o espírito docente ía impregnado dunha exaltación
democrática. A que ven implícita na conversa de Vergara con Montse, que
chama a atención dunha dona de dereitas, quen me telefonea axiña para
que a lea. Despois de facelo volvo admirar a lucidez de Xosé Luís
Vergara, un político para o futuro. Por máis que agora diga o contento
que se sinte volvendo ao seu cuartel de inverno. Con Hispana ao seu lado
non me sorprende. Pero non, caro Xosé Luís, xente coma ti non nos pode
deixar ao vintemperio. Fasnos falla. E moita. Así que apenas un acougo,
un lecer, e volta ao choio. E graciñas por canto fixeches por Cedeira.
Miña segunda patria.
"
link: DFONLine - © 2011 Vicente Araguas
|
|