Detido un veciño da Vila
Fecha Domingo, 22 mayo a las 08:48:47
Tema PHP-Nuke
Axentes da Garda Civil e da Policía Local de Cedeira detiveron na tarde
do venres a un veciño da localidade, V.P.G., de 30 anos de idade,
despois de que agredise a varias persoas, entre elas a súa parella,
dentro do bar Uruguai e rompese a lúa do céntrico establecemento da vila
mariñeira.
Segundo relatan testemuñas oculares do altercado, ao redor das sete e
media da tarde do venres, e sen mediar palabra, o agresor encarouse coa
súa compañeira sentimental á que propinou unha labazada na cara. Pouco
despois saltou ao interior da barra onde golpeou a unha das camareiras
do bar. A partir dese momento, colleu as cadeiras e as banquetas do
local e lanzounas contra a lúa do mesmo ata que rompeu.
Lesións a un policía
Os responsables do establecemento avisaron tanto á Garda Civil como á
Policía Local. Poucos minutos máis tarde apareceron no lugar unha
patrulla de cada corpo de seguridade. Os efectivos trataron de reducir
ao agresor, pero durante o forcejeo cos axentes un policía resultou
lesionado.
Finalmente, conseguiron esposarlo e foi a Garda Civil quen o trasladou
ao cuartel de Ferrol, onde permanece detido, para tramitar as
dilixencias oportunas.
Fontes oficiais do caso aseguran que se lle imputan un delito de
violencia de xénero, un de danos e outro de lesións. O valor total dos
danos que causou no bar Uruguai é de 1.000 euros. Aínda non está claro
cando pasará a disposición xudicial, pero podería ser hoxe ou ao longo
da xornada de mañá.
Link: VONLine
|
|