A xunta de goberno de Cedeira aprobou onte por unanimidade enviar á
fiscalía o expediente dunhas obras relacionadas cun concelleiro popular,
Alfredo Vilela Santalla, número dous da lista do Partido Popular para
as próximas eleccións.
Segundo informan fontes municipais, Vilela iniciou a construción dun
recinto hostaleiro nunha parcela cualificada como chan rústico que
dispón dunha protección especial agropecuaria incompatible co uso
comercial e dependente da Axencia de Protección da Legalidade
Urbanística (APLU). Ademais, indican desde o Concello que a construción
está situada a tan só metro e medio do río que abastece a
subministración de auga da vila e Augas de Galicia tamén debe estudar a
licenza.
© 2011 - La Voz de Galicia
Pola súa banda, o concelleiro afectado asegura que se trata de chan
común tradicional onde xa existía unha antiga construción de fai ao
redor de corenta anos. O anterior propietario do terreo remitiu unha
solicitude de licenza de obra maior para a adaptación do local para
convertelo en café-bar mesón no ano 1999. E dous anos máis tarde, o por
entón arquitecto municipal ditou un informe favorable.
O concelleiro, que herdou o terreo cando aínda non finalizaran as obras,
asegura que presentou outro permiso de licenza urbanística en agosto do
2010 para unha obra menor de reparación de tellado, substitución de
fiestras, recebo da parede exterior e colocación dunha porta, da que
aínda non recibiu contestación xa que a xunta aprobou onte denegarlle o
permiso.
«En xaneiro comezamos coas obras xa que consideramos que están aprobadas
por silencio administrativo», detalla Vilela. Neste tempo, o goberno
local afirma que precintaron a zona en dúas ocasións. O concelleiro di
que só foi unha vez, sen que se paralizasen as obras.
A xunta de goberno considerou que desoír as súas indicacións e continuar
coa construción pode constituír un delito de desacato á autoridade, por
iso trasladou a documentación ao fiscal para que estude se se trata dun
acto penal.
Link: VONLine