O alcalde de Ferrol, Vicente Irisarri, arroupado por integrantes das
candidaturas socialistas dos concellos de Narón, Valdoviño, Cedeira,
Pontedeume, Ortigueira e Moeche, presentou a iniciativa que está
impulsando o PSOE para a creación dun fondo comarcal de «entre tres e
cinco millóns de euros» co obxectivo de apoiar aos novos empresarios. Os
socialistas reiteraron que con esta ferramenta financeira buscan
combater o desemprego, «o maior problema que está padecendo Galicia»,
dunha forma «conxunta e coordinada» entre os concellos de Ferrolterra,
Eume e Ortegal.
© 2011 . La Voz de Galicia
«O que buscamos é repetir a fórmula do Plan Ferrol nas pequenas empresas», dixo o alcalde de Cedeira, José Luís Vergara.
«A cooperación entre distintos concellos non é nada extraordinario,
porque é a forma de traballar que levamos mantendo nos últimos catro
anos», comentou Irisarri, quen agregou: «A Mancomunidade pasou de ser un
instrumento para enfrontarse contra outras administracións para ser un
organismo básico no aforro de servizos e posta en marcha de iniciativas
como programas de reciclaxe ou zonas de reposición para vehículos
eléctricos». Neste fondo de capital risco que crearían os diferentes
concellos da comarca estarían representados os concellos, a Deputación
da Coruña, a Xunta, o capital privado e as caixas de aforro ou entidades
bancarias. A xestión correría a cargo dunha empresa externa quen sería a
encargada de avaliar os proxectos susceptibles de recibir
financiamento. Uns proxectos que poderían recibir como máximo
aproximadamente 100.000 euros.
Link: VONLine