As festas: a concurso
Fecha Viernes, 15 abril a las 08:45:42
Tema PHP-Nuke
O Concello de Cedeira saca a concurso negociado a organización das
festas patronais que se celebran na vila o mes de agosto. Esta semana
reuniuse a xunta de goberno local na que se aprobou iniciar os trámites.
O Concello xa anunciou a finais do ano pasado que tomaría esta medida
para organizar unhas festas máis rendibles. «Facemos público o orzamento
do que dispón o Concello, coa intención de que as empresas que poidan
estar interesadas propoñan o seu programa de actividades e concertos e a
partir de aí escollerase o proxecto máis competente», explica o alcalde
da vila, Jose Luís Vergara.
As empresas interesadas en participar disporán dun orzamento de sesenta
mil euros para a contratación de grupos de música e orquestras que
amenicen as festas do día 14 ao 17 de agosto. Ao ser un concurso
negociado, a convocatoria non sairá reflectida no Boletín Oficial do
Estado. Desde a administración local prevén anunciar o concurso na
páxina web do consistorio e invitar a varias compañías da comarca e fóra
de Galicia que poden estar interesadas no proxecto. «Para que non se
repitan os problemas doutros anos, esixiremos á empresa que reciba a
adxudicación que pague todos os canons esixidos pola SGAE», ironiza o
rexedor.
Este é un dos tres bloques nos que a administración local dividiu as
festas. Nas próximas semanas procederá a negociar o orzamento da
iluminación e os lumes. Para simplificar os trámites e non ter que
convocar tres concursos distintos, desde o Concello explican que
destinarán partidas inferiores aos 18.000 euros nestas concesións.
Ademais, fontes do goberno local aseguran que redactarán unha ordenanza
municipal para controlar a instalación de casetas e postos de feira.
Problemas coas comisións
No ano 2008, un grupo de empresarios colaborou co goberno local na
organización dos festexos. Tras esta experiencia, unha comisión de
festas organizou os eventos dous anos consecutivos coas que, segundo
indican desde o PP, o Concello debe en total ao redor de cen mil euros.
«Legalmente non se lles debe nada, pero o goberno local deixoulles co cu
ao aire coa débeda pendente. Vergara liquidou o modelo de comisión
cidadá, xa ninguén quere organizar as festas», aseguran desde o partido.
Link: VONLine
|
|