Concello de Cedeira - Urbanismo
Fecha Sábado, 02 abril a las 08:48:20
Tema PHP-Nuke
O fiscal do Tribunal Superior de Xustiza de Galicia (TSXG), Antonio Roma
Valdés, especializado en temas de urbanismo, presentou unha denuncia no
Xulgado de Instrución número 1 de Ortigueira, o 20 de setembro do 2010,
contra os responsables dun edificio de Cedeira que presenta
irregularidades con respecto ao proxecto de obra inicial.
Un veciño da vila presentou unha denuncia previa á fiscalía que abriu
dilixencias para estudar o caso. O fiscal, considerando que hai indicios
de delito ou falta, trasladou a denuncia ao xulgado de Ortigueira, ao
que lle corresponde a xurisdición do termo municipal de Cedeira. Este
particular tamén avisou ao Concello da situación na que se atopa o
inmoble para que o consistorio iniciase un expediente de revisión de
licenza.
Segundo informan fontes da actual corporación municipal, os feitos
remóntanse a antes da celebración das últimas eleccións municipais. O
alcalde de entón, Leopoldo Rubido, aprobou a licenza de primeira
ocupación contraviniendo o informe do técnico municipal que, aínda que
non é vinculante, cualifica a construción como unha obra «non
legalizable».
O edificio, situado na Rúa do Convento fronte ao auditorio municipal,
presenta unha serie de variacións con respecto ao proxecto inicial. A
máis grave, segundo o Concello, é a construción dunha planta máis das
establecidas. Ademais, o proxecto estipulaba que o garaxe contaría con
dúas portas e actualmente hai sete.
Desde o grupo municipal do Partido Popular aseguran que se trata dun
conflito privado entre un particular e un promotor, e terá que ser un
xuíz «o que dite unha resolución e ditamine se hai algunha ilegalidade
na construción». Aseguran que o actual alcalde da vila, Jose Luís
Vergara, estao tratando como un tema político no canto de mostrarse
«discreto e imparcial» cun problema que incumbe a uns particulares do
municipio. «Vergara confunde o estado democrático co actuar dun xerife
do afastado Oeste».
Link: VONLine
|
|