Un ano máis, a praia da Magdalena
Fecha Viernes, 01 abril a las 08:52:45 Tema PHP-Nuke
Un ano máis, a praia da Magdalena será obxecto dunha intervención por
parte da Demarcación de Costas para devolver ao areal o seu estado
previo ao paso dos temporais e a acción do inverno e as mareas. Así,
comunicárono onte en Cedeira responsables deste organismo público, que
visitaron o areal en compañía do alcalde do municipio, o socialista José
Luís Vergara.
O Concello manifestou en reiteradas ocasións a súa preocupación polo
estado que presenta nos últimos meses a principal praia do municipio,
moi danada tras o paso do temporal "Becky" en decembro. A Magdalena
sufre todos os anos de forma preocupante os efectos do inverno e as
mareas, que inciden dunha forma moi particular sobre o areal. A acción
do mar e os ventos é especial na vila, tanto, que técnicos de Costas
aseguraron no seu día que era a praia que máis sufría do litoral coruñés
e ata de toda Galicia o paso do inverno. Fai un par de anos que
responsables da Demarcación de Costas anunciaron unha actuación de maior
envergadura que permitise pór fin a este efecto cíclico que dana tanto o
areal, pero ata a data non hai novidades respecto diso. De feito, os
responsables do organismo dependente do Ministerio de Medio Ambiente,
Rural e Mariño (MARM) só anunciaron dúas intervencións similares ás
doutros anos, unha con carácter inmediato para arrombar o areal de face
ás vacacións de Samana Santa e outra prevista para o mes de maio,
pensando xa na época estival.
A primeira actuación non contemplaría ningún achegue de area, xa que en
principio prevese achandar a superficie cos áridos que se foron
sedimentando por distintos puntos da zona. Xa en maio, si se espera
transvasar algo de area de áreas próximas.
Link: DFONLine
|
|