O temporal remite e abandona a costa do Ortegal sen deixar incidentes de
gravidade tras tres días de alerta. Durante a xornada de onte, os
concellos da comarca fixeron balance das desfeitas que causou a tormenta
nos diferentes municipios e finalizan os labores de reparación das
últimas incidencias.
Onte, a estación de punta Candieira rexistrou os ventos máis fortes a
primeiras horas da mañá, chegando a exceder os oitenta quilómetros por
hora, unhas cifras altas pero que adoitan ser habituais nos cantiis de
Cedeira.
O forte vento da xornada anterior e a choiva intensa puideron ser as
causas do desprendemento de parte da cornixa dun balcón na rúa Moeche. O
incidente non afectou a ningún veciño, e onte ao mediodía xa se
retiraron os restos do esborralle.
A praia local da Magdalena sufriu gravemente o azoute da ondada, e o mar
volveu gañarlle terreo á zona de area. Desde o Concello informan que as
ondas empeoraron o estado do noiro que causou a tormenta Becky o pasado
mes de novembro. «O desnivel da area xa supera con fartura os dous
metros de altura, e cando sobe a marea, apenas queda espazo de area sen
alagar», explica o alcalde de Cedeira, Jose Luís Vergara.
© 2011 - Concello de Cedeira
Recuperación do areal
Costas xa anunciou cando se produciu o incidente coa anterior tormenta
que o organismo prepararía un plan de recuperación do areal, aínda que
non levará a cabo ata finalizar o período de temporais. Esta zona de
litoral vese afectada cada ano polo mal tempo e o proxecto busca atopar
unha solución que asegure a praia a longo prazo.
En Ortigueira, a intensidade da choiva provocou que se esborrallase
terra sobre un dos carriis da estrada de circunvalación que conduce
desde o centro urbano á praia de Morouzos, formando un noiro de escasa
magnitude á beira do viario. O Concello sinalizou a zona e alertou á
Deputación, administración titular da estrada, do sucedido. Onte ao
mediodía completáronse os traballos de retirada dos restos de terra.
A flota pesqueira de Agarimo continuou a xornada de onte amarrada como
medida de precaución, aínda que as previsións xa indicaban que pola
tarde melloraría o estado do mar.
O porto cariñés e o de Estaca de Bares levaron a peor parte deste
temporal, sufrindo novamente esborralles dalgunhas pedras que reforzan a
estrutura dos peiraos.
Link: VONLine