“Haberá renovación tamén na comarca”
Fecha Sábado, 21 marzo a las 09:07:03 Tema PHP-Nuke
O BNG perdeu nos
comicios á Xunta do pasado 1 de marzo na comarca máis dun 28% de
respaldo electoral con respecto ós de hai catro anos e na cidade de
Ferrol a caída chegou ata o 38%. Os malos resultados obrigan á
organización nacionalista a abrir unha nova etapa, que en Ferrolterra
estará marcada pola renovación na dirección.
Despois
de tres mandatos á fronte da dirección do BNG en Ferrolterra, Manuel
López Foxo deixa abertas as portas ao cambio. Pensa que tralos
resultados electorais “é positivo renovar a organización para volver a
ilusionar ao conxunto da militancia”. O BNG prepárase para unha nova
etapa, tamén na comarca.
© 2009 Diaro de Ferrol
Os malos resultados electorais
provocaron a demisión de toda a executiva do BNG e a convocatoria dunha
asemblea extraordinaria para elixir unha nova dirección. ¿Haberá tamén
cambios na comarca? O BNG está a iniciar un novo
ciclo que suporá unha renovación de persoas a calquera nivel da
organización. Seguramente no Consello Comarcal haberá rostros novos e
se incorporen outras persoas, o que axudará a dar ao BNG o pulo que
necesita para a etapa que estamos a comezar. No mes de xuño estará
renovada a executiva comarcal, ao igual que o resto de órganos de
dirección do BNG, e no momento en que se produzan as asembleas
comarcais para elixir o novo Consello Comarcal estou plenamente
convencido e seguro de que haberá tamén renovación neste órgano e que
outros compañeiros e compañeiras retomarán o traballo que viñemos
facendo. ¿Optará á reelección? Penso que é
moi positivo para o BNG que haxa rostros novos e compañeiros que asuman
a responsabilidade e eu colaborarei en que iso sexa así. Eu o que quero
é que o BNG recupere na comarca o espazo perdido e, dende logo, eu
serei un militante máis a prol deste obxectivo. ¿É o momento
de abrir a participación na dirección a outras correntes do BNG que non
se senten representadas na actual e artellar un Consello Comarcal máis
plural? Como responsable comarcal sempre tratei de
sumar e de integrar. Do que un non é responsable é de cando alguén non
se sente cómodo ou considera que as súas ideas non son apoiadas pola
maioría e desiste de seguir nun órgano. Aí xa non poido facer nada.
Considero que as ideas da minoría e a pluralidade ideolóxica que hai no
seo do BNG hai que respectalas dunha forma exquisita. ¿Gustaríalle que houbera unha candidatura única? Sempre
fun defensor das candidaturas de consenso. Hai que procurar buscar o
denominador común nas ideas que temos que defender e buscar a aquelas
persoas que faciliten un traballo cómodo e en plena sintonía na
dirección, cos debates que sexan necesarios pero sempre tentando o
consenso e unha liña de actuación común que lle permita ao Consello
Comarcal facer o seu traballo sen grandes sobresaltos. Isto sería o
máis positivo para o BNG, porque para actuar na sociedade con eficacia
o primeiro que hai que ter é serenidade interna, a cal sempre é máis
factible cunha candidatura de consenso. ¿Como frear a tendencia á baixa de cara aos comicios locais de dentro de dous anos? Os
resultados tanto a nivel nacional como comarcal son claramente
negativos. Temos que tomar nota e saber detectar onde cometimos erros e
que temos que mellorar para no futuro non repetilos. En Ferrol, onde
tocamos fondo nas pasadas locais e baixamos máis de seis puntos con
respecto ás autonómicas do 2005, obsérvase unha lenta recuperación no
voto ao BNG. E nos pequenos e medianos concellos a sociedade recoñeceu
o traballo do BNG, como é o caso de Moeche, San Sadurniño ou
Vilarmaior, nos que obtivemos bos resultados. De cara ás vindeiras
municipais, non dubido de que o BNG ocupará unha posición na comarca
moi por riba da que ten neste momento. E no caso de Ferrol, ¿repetirá Xoán Xosé Pita como candidato? É
un debate que non nos corresponde facelo agora, o que toca facer é
renovar a organización a nivel local e comarcal. Se renovamos a
formación en Ferrol e se lle dá a vitalidade que debe ter estaremos en
condicións de que cando chegue o momento de elixir á candidatura para
as municipais contemos nela coas mellores persoas que poidamos ter para
presentar a mellor alternativa nacionalista ao Concello ferrolán. Voltando ás eleccións do pasado 1 de marzo, ¿a que pensa que se debeu a perda de respaldo electoral ao BNG nesta comarca? Sempre
hai moitos factores que inflúen. Polo traballo feito dende o goberno
galego, penso que en xustiza o BNG merecía outros resultados, pero son
consciente de que non fomos capaces de que a sociedade o visualizara.
¿Houbo algunha outra forza política que pelexara tanto por reactivar
Astano como o BNG? Desgraciadamente, este e outros debates quedaron
eclipsados na campaña polo coche de Touriño, a fotografía de Quintana
nun iate cun empresario... A isto hai que sumar que o señor Gato (Xoán
Gato, líder de Terra Galega) case parecía máis un afiliado do PP que un
candidato. Todo desgasta. E a falta de sintonía coa principal
organización nacionalista da comarca, a CIG, ¿non pensa que tamén
influíu na caída electoral? Non fomos nós os que nos
distanciamos do camiño conxunto. Os responsables comarcais da CIG non
defenderon o chamado Plan Barrera para Astano impulsado pola
Consellería de Industria e, pola contra, si que se manifestan a prol do
Plan Ferrol. A CIG é unha organización autónoma e as súas decisións son
totalmente lexítimas, pero dende o punto de vista do BNG, foi a CIG a
que se distanciou dese camiño que podiamos percorrer xuntos. Pero non
son quen de dicirlle á CIG o que ten que facer. ¿É posible
cicatrizar as feridas co sindicato nacionalista e retomar un certo
clima de colaboración pensando en próximas citas electorais? A nosa vontade é coincidir tamén coa CIG na defensa desta comarca e facer fronte á crise económica e ao desemprego que padece .¿Pensa necesaria unha reformulación dos pactos co PSOE existentes en Ferrolterra? Temos
que aprender do traballo que levamos feito nos últimos anos nos
distintos gobernos locais, provinciais e na Xunta para que sexa posible
a alternativa ao PP e para que a sociedade perciba que BNG e PSOE poden
conformar gobernos estables nos que as dúas forzas colaboran e non que
compiten entre elas. As coalicións que hai nesta comarca non teñen
sobresaltos, pero tras o congreso, no caso do PSOE, e a nosa asamblea,
teremos que sentarnos para que no que resta de mandatos melloremos
algunhas actitudes.
LInk: DFONLine
|
|