Rede de sumidoiros
Fecha Martes, 07 diciembre a las 08:01:19
Tema PHP-Nuke
As zonas de Gaias de Area e Arriba da Ponte, barrios da zona baixa de
Cedeira, sufriron onte pola mañá problemas coa rede de sumidoiros de
augas. Tras a gran tromba de auga que caeu á primeira hora na zona do
Ortegal, parte do sistema de recollida de augas de Cedeira mostrou as
súas deficiencias ao verse colapsado. Algúns sumidoiros sobordaron e
deixaron saír á superficie a auga.
Segundo o alcalde da vila, Jose Luís Vergara Rey, son problemas puntuais
que manifesta a rede en momentos de choiva moi intensa. «Aínda que non
afecte a moitas casas, para o Concello é un problema moi grave polo
prexuízo que ocasiona aos veciños», asegura o primeiro edil. Foi o
propio alcalde o que tivo que avisar á empresa que leva os servizos dos
problemas que estaban acontecendo para que limpase as redes de
sumidoiros con problemas.
A rúa Gaias de Area atópase nunha zona de bifurcación de augas, e recibe
unha gran afluencia de pluviais de Piñeiro. Fai apenas uns meses o
Concello xa levou a cabo un plan de reparación e substitución de parte
de sistema de tubaxes da zona. «A maior parte da auga pluvial que recibe
a área de Gaias intentouse derivar a outras redes, pero vemos que foi
unha medida insuficiente», explica Vergara. O barrio de Arriba da Ponte
tamén tivo problemas, segundo o Concello, pola saída de augas «tan
estreita» que ten a zona.
O rexedor pide ao actual Goberno da Xunta que acometa as reformas que
estaban aprobadas pola anterior lexislatura. «Tiñamos aprobado un
proxecto para o paseo da Magdalena, agora non sabemos cando levará a
cabo», lamenta. Vergara asegura que o sistema de canalización dalgúns
barrios do municipio non se repararon desde fai máis de 25 anos, e
seguen sendo tubaxes de cemento que deixan traspasar a area, o que
dificulta a canalización en momentos de moita choiva. O Concello xa
levou a cabo varios proxectos de substitución destas canalizacións por
sistemas de PVC herméticos nalgunhas redes radiais do municipio.
LinK.VONLine
|
|