Cambio de goberno
Fecha Domingo, 15 marzo a las 08:36:33 Tema PHP-Nuke
O cambio de goberno autonómico elixido democraticamente nas urnas o un
de marzo leva que, nalgúns casos, máis dun tema por aqueles proxectos
que foron comprometidos verbalmente polo goberno bipartito e agora
haberá que volver negociar, no mellor dos casos.
O alcalde de Cedeira, o socialista José Luís Vergara, é un dos que
manifestan abertamente o seu temor ante o feito de que certos proxectos
importantes para a vila mariñeira caian agora en saco roto, tras a
perda de poder do bipartido (PSOE-BNG) na Xunta de Galicia. Unha das
cuestións que máis preocupa ao rexedor local, que goberna xunto co BNG
e TEGA, é o arranxo da AC-566, a vía que comunica a vila con Ferrol e
que discorre, na maior parte do seu trazado, polo municipio de
Valdoviño. Como se lembrará esta vía foi obxecto de reforma, sobre todo
o pasado ano, por parte da Consellería de Política Territorial. Algunha
destas melloras, como a supresión de liñas descontinuas ou a
incorporación de beirarrúas en Valdoviño, foron moi discutidas polos
partidos da oposición e mesmo polo BNG de Cedeira.
Esta infraestrutura é de vital importancia para os cedeirenses, para
comunicarse con Ferrol, e coa AP-9. O alcalde de Cedeira, José Luís
Vergara, teme agora que todo o que se adiantou con respecto a esta vía
-compromisos verbais por parte da Cptopt- queden nun vago recordo. Pero
se a AC-566 é importante para a vila de Cedeira non o é menos o seu
porto deportivo. Como se lembrará, o proxecto inicial da dársena non
gustou nada nin á Confraría de Pescadores nin ao consistorio, debido ao
ambicioso do proxecto, que prevía construír unha estrutura con 411
puntos de amarre para embarcacións de recreo de entre 6 e 16 metros de
eslora. O mesmo proxecto contemplaba a construción dun dique de abrigo
de 315 metros de longo, dentro dunha ría de 1 quilómetro de ancho.
Tanto a Confraría da vila como o Consistorio presentaron alegacións ao
proxecto inicial, obtendo até a data un compromiso, verbal, de Portos
de Galicia para reducir parte do número de amarres. A día de hoxe non
existe comunicación oficial de Portos sobre esta redución de dimensións
da dársena, algo que tamén preocupa ao rexedor local, sobre todo agora
que se aveciña un cambio de goberno.
Outra das apostas do goberno tripartito de Cedeira é a mellora da rede
de saneamento en toda a vila. Aínda que xa se iniciaron algúns
proxectos e asinado outros, como a separación de pluviais e fecais en
varios puntos do municipio, este proxecto ambicioso tamén requirirá do
respaldo do novo goberno da Xunta, algo co que conta o alcalde da vila.
Link: DFONLine
|
|