Concello de Cedeira - AC566
Fecha Viernes, 15 octubre a las 12:05:38
Tema PHP-Nuke
O Concello de Cedeira retoma as súas reivindicacións con respecto á
AC-566. Así, o alcalde, José Luís Vergara, estuda a posibilidade de
convocar para a próxima semana a celebración dunha xunta de portavoces a
fin de invitar ao conxunto das forzas políticas a sumarse a un máis que
probable calendario de mobilizacións.
Este, segundo as intencións do primeiro edil, pasa inicialmente por unha
inicial aproximación á poboación local coa distribución de panfletos
aproveitando a cita do feirón que todos os segundos domingo de mes ten
lugar no municipio. Vergara confía en contar coa axuda e colaboración
das entidades con representación no termo municipal para poder
desenvolver unha iniciativa coa que se busca chegar á xente, ademais de
dar a coñecer as pretensións que o goberno ten con respecto á citada
estrada. Estas pasan obrigatoriamente, segundo o alcalde, por conseguir
da Xunta que inclúa unha partida suficientemente ampla nos seus próximos
orzamentos para que se poidan acometer as obras de ampliación e
mellora comprometidas no seu día polo goberno bipartito para a citada
estrada.
Un trazado con 69 curvas e un asfalto en moi malas condicións, por non
citar os oito accidentes mortais ocorridos nos últimos meses, son os
principais argumentos que se apuntan desde a administración local de
Cedeira para non descartar, ata, unha posible marcha a pé ata a cidade
de Ferrol. Así, búscase evidenciar o malestar que existe no municipio
con respecto ás condicións da vía. Esta, a día de hoxe, representa a
única comunicación que teñen os cedeirenses para viaxar a outros
territorios da comarca.
Link: DFONLine
|
|