Normalidade no día de Folga
Fecha Jueves, 30 septiembre a las 09:36:55 Tema PHP-Nuke
Noutros municipios de Ferrolterra, os piquetes e os establecementos
pechados ante a presión sindical só víanse pola televisión. E é que a
folga pasou desapercibida polos concellos da comarca do Ortegal e por
Valdoviño e Cedeira, onde a paz reinou e a actividade comercial foi
constante durante todo o día.
Nas instalacións portuarias tampouco se produciron incidentes e a
mercancía dos barcos descargouse sen atrasos na maioría das vilas
mariñeiras.
Foi no concello cedeirense onde o paro parecía deixar menos pegada. Un
percorrido pola vila era suficiente para observar como na maioría dos
negocios os clientes realizaban as súas compras como un día calquera de
semana, aínda que cabe destacar que moitos empresarios aseguraron notar
unha baixada nas vendas, achacando tamén este feito á choiva que caeu
intermitentemente durante todo o día.
María Antonia Díaz, propietaria dunha céntrica florería de Cedeira,
asegura que a inexistencia de piquetes e mobilizacións pola folga xeral
posibilitou que os propios comerciantes decidisen libremente exercer o
seu traballo. «Non está o país para deixar de vir vender, fai moita
falta», dixo.
A mesma opinión compartíaa María José García, dependenta dun comercio de
roupa, que afirmou, no entanto, que o seu marido que traballa en
Somozas si secundou a folga pola repercusión maior que o paro tivo nesta
zona.
As cafeterías da praza de Galicia enchéronse de clientes que comentaban,
sen ser testemuñas presenciais, a existencia da folga xeral.
Os supermercados funcionaron durante todo o día con normalidade do mesmo
xeito que os establecementos bancarios. Non se rexistraron apenas
incidencias. Link: VONLIne
|
|