Portal de Noticias Cedeira OnLine Café Bar A MARINA

O último accidente mortal na estrada que une Ferrol con Cedeira, a AC-566, e que se cobrou na tarde do mércores a vida dunha veciña de 19 anos da vila mariñeira significa para o goberno local a pinga que colmou o vaso. O sinuoso trazado do viario provocou no que vai de ano o falecemento de tres persoas. Por este motivo, o Concello reclamará á Xunta que mellore tanto o trazado como o firme da calzada. Se non recibe unha resposta positiva do Executivo autonómico baralla a posibilidade de convocar mobilizacións.

«É intolerable», explica o alcalde de Cedeira, o socialista José Luis Vergara, quen agrega: «Moitas veces a administración escúdase en que a xente vai moi rápido, pero na vida hai poucas casualidades e no tramo da estrada AC-566 sufrimos tres accidentes mortais en tan só oito meses». «¿Que máis ten que pasar para que a Xunta inclúa entre as súas prioridades a remodelación deste viario?», apunta o rexedor.

Pleno extraordinario

Unha das iniciativas que tomará o goberno local é a convocatoria dun pleno extraordinario a próxima semana cun só punto na orde do día: a remodelación desta estrada. «Queremos -sinala José Luis Vergara- que todos os grupos políticos camiñemos na mesma dirección, porque é moi importante estar unidos para presionar á Xunta e que acometa os traballos dunha vez por todas». O alcalde indica que o PSOE xa levou no principio do ano unha moción ao pleno para pedir ao Goberno galego que acometa óbralas pertinentes no viario co obxectivo de que se incremente a seguridade dos seus usuarios. «Naquela ocasión o PP decidiu non apoiarnos, pero confiamos en que agora rememos todos á vez», comenta Vergara.

Así mesmo, o rexedor criticou ao conselleiro de Medio Ambiente, Territorio e Infraestruturas, Agustín Hernández, a quen tamén visitou a principios do 2010. «Recordo perfectamente que xa se produciu o primeiro accidente mortal e naquel momento asegureille que non ía a Santiago a botarlle os mortos encima da mesa, pero que cría que as melloras na estrada AC-566 debían ser unha prioridade», explica. «Despois, o seu sectarismo político excluíume das últimas reunións da vía de alta capacidade. Un sectarismo político que non está á altura do cargo público que ostenta», afirma antes de recordar que «as variantes de Cedeira e de Valdoviño desa infraestrutura que conectará o norte de Galicia dormen plácidamente nun caixón desde hai tempo». «A vila está hoxe [por onte] consternada polo falecemento desta moza que pertencía a unha familia moi querida no pobo, pero a partir de mañá [por hoxe] debemos pensar en facer o posible para que isto non volva suceder», recalca Vergara.

O Concello valdoviñés

Desde o goberno local de Valdoviño (municipio no que se produciu o accidente mortal do mércores) tamén reclamaron que se poñan as medidas necesarias para que non se repitan este tipo de episodios. «Estamos consternados polo sucedido e non entendemos como os sucesivos gobernos que pasaron pola Xunta non acometeron xa as obras de remodelación deste tramo da estrada», explica o concelleiro Antonio Montero, quen recalca: «Debe ensancharse a calzada e, sobre todo, eliminar as curvas que son extremadamente perigosas».

Link: VONLine