Saen á venda as entradas para o concerto de Leonard Cohen
Fecha Jueves, 12 agosto a las 17:44:31 Tema PHP-Nuke
Desde hoxe pódense adquirir as entradas para asistir ao concerto que o
mítico cantautor canadense Leonard Cohen ofrecerá o vindeiro 12 de
setembro a partir das 21.00 horas no Pavillón Paco Paz de Ourense,
dentro da programación deseñada para o Camiño da Música de Xacobeo 2010.
As localidades pódense adquirir desde hoxe en Caixa Galicia, a través
da súa web ou por teléfono no 902434443, e tamén en El Corte Inglés, na
web, no teléfono 902400222 e nos seus centros comerciais. Proximamente
estarán tamén dispoñibles en Caixanova. Os prezos das entradas en venda
anticipada son de 40, 25 e 15 euros, máis gastos de xestión.
Desde o seu regreso aos escenarios en 2008, o artista ofreceu preto
de 200 concertos en todo o mundo. Parte xa do Songwriters Hall of Fame
de Nova York, Cohen atópase inmerso nunha xira europea que recalará en
Ourense da man de Xacobeo 2010 a só dez días de cumprir 76 anos e que
será o preludio do lanzamento o próximo ano do seu novo traballo de
estudo, sete anos despois de publicar Dear Heather. Neste novo disco os
afeccionados á música de Cohen atoparán influencias doutros grandes como
Bob Dylan, Judy Collins, Tom Waits ou Van Morrison.Sen dúbida, o
que ofrecerá Leonard Cohen en Ourense será un dos concertos máis
emotivos dentro da programación do Camiño da Música. Nesta actuación, o
canadense repasará temas do seu último traballo, Live in London, gravado
en directo no seu regreso aos escenarios despois de quince anos nunha
actuación en Londres en 2008 e que supón un percorrido polas grandes
composicións que marcaron os seus 40 anos de carreira profesional.Link: XONLine
|
|