O consello local do BNG de Cedeira maniféstase sorprendido polas
afirmacións atribuídas ao alcalde nas que informa de que a agrupación
socialista de Cedeira tomou a decisión de retirar o salario do alcalde e
concelleiros que actualmente o perciben.
Entende o BNG
local que esa decisión, de producirse, corresponde exclusivamente ao
ámbito institucional, é dicir, ao pleno do concello, que é quen ten as
competencias . Non facelo desta maneira é unha falta incomprensible de
respecto á máxima institución local, tanto por parte do alcalde como
por parte da agrupación socialista.
No plano político,
entende o consello local do BNG, o goberno municipal, incluída a
alcaldía son o resultado dun pacto de lexislatura entre tres forzas
políticas PSOE, BNG e Terra Galega, e calquera variación que se queira
introducir debe ser o resultado dun acordo entre as tres forzas. Por
iso non se comprende que, unilateralmente, se adopten decisións que
corresponden aos tres grupos en conxunto, a non ser que o alcalde e o
grupo socialista se sitúen fóra do pacto ou pretendan establecer unha
nova alianza no concello.
En canto á medida en si, o BNG
local non entra a valorala por atribuíla a unha irresponsable deriva
demagóxica impropia dun cargo institucional e moito menos da
organización política á que representa.
Os concelleiros e
concelleiras do BNG no concello de Cedeira son representantes dos
veciños , a eles se deben e dedican o seu traballo sen que os mova
ningunha motivación económica. Proba diso é que a concelleira de
Servizos Sociais Manuela López Rodríguez renunciou ao inicio da
lexislatura ás súas retribucións para que o concello contrátase dúas
persoas a tempo parcial que fan que os Servizos Sociais do concello de
Cedeira sexan dos de maior calidade da comarca.
O BNG de
Cedeira empraza ao PSOE local a unha reunión para coñecer de primeira
man se a proposta que se plantexa nos medios de comunicación responde a
unha nova iniciativa da política contra a crise de Zapatero, de
aplicación a todos os cargos do PSOE en todas as institucións, ou se se
trata dunha iniciativa local para saírse do pacto de goberno.
Cedeira, 15 de maio de 2010
CONSELLO LOCAL DO BNG DE CEDEIRA
Link: Consello local do BNG Cedeira