Portal de Noticias Cedeira OnLine Café Bar A MARINA

O goberno municipal de Cedeira administrará este ano algo máis de catro millóns de euros, segundo o acordo adoptado polo pleno do Concello na xornada do pasado martes. A aprobación dos orzamentos, que o alcalde, José Luís Vergara, definiu de "moi austeros", non quedou exenta de polémica, polo menos por parte do PP.

O grupo conservador abandonou a sesión por considerar que o asunto fora introducido a traizón na orde do día da sesión, na que "inicialmente non estaba previsto", segundo apuntou a este diario o portavoz "popular", Eduardo Foces. No entanto, esta postura posteriormente sería rebatida pola alcaldía ao lembrar que as contas municipais foran presentadas a cinco días da celebración do pleno no seo da comisión informativa de Facenda.

En canto aos orzamentos municipais cabe destacar algunhas cuestións. Tres poden ser as principais. Así, xerarán un superávit de 400.000 euros, representan unha redución de ingresos de algo máis de 600.000 euros con respecto ao do exercicio 2008 e darán lugar á aplicación de novas taxas, como a do lixo, da que até o momento quedaran á marxe os contribuíntes de Cedeira. Desde o goberno municipal (PSOE, TEGA e BNG) apúntase que todas elas son unha consecuencia máis do plan de saneamento económico que o Concello subscribiu indirectamente ao aceptar os termos do préstamo que no seu día subscribiu co Estado para facer fronte a pagos puntuais con provedores.

No que se refire á nova taxa, a recadación da mesma garante uns ingresos ao consistorio de aproximadamente medio millón de euros. A cota prevista oscilará entre os 60 e 37 euros, en función da localización da vivenda, e a medida xerará a expedición de 7.000 recibos. O censo actual é de 7.500 veciños.

Link: DFONLine