|
Menú | |
Online | |
Actualmente hay 73 invitados, 0 miembro(s) conectado(s).
Eres un usuario anónimo. Puedes registrarte aquí | |
Información | |
| |
| Montes de titularidade pública |
Practicamente a totalidade da madeira procedente dos montes de
titularidade pública da comarca, que foron danados polo "Klaus", está
vendida. No caso concreto de Cedeira, onde Concello e Xunta comparten
os beneficios da venda da madeira, a cantidade que se obterá por esta
transacción é tres veces menor ao que se percibiría anos atrás, debido
á depreciación que sofre o produto no mercado.
Aínda permanecen latentes os efectos do paso pola comarca do furacán "Klaus", o pasado 23 de xaneiro. Pasear polos montes de Ferrol, Eume e
Ortegal convida a reflexionar sobre a magnitude dun temporal que restou
gran protagonismo a outro que aínda permanecía na retina e o recordo de
moitos galegos, como o "Hortensia".
Desde aquel día, no Distrito Forestal I, que ten a súa sede en Ferrol
pero que abarca os montes de toda a comarca, traballouse moi duro para
recuperar os terreos de titularidade pública afectados polos fortes
ventos que trouxo o "Klaus". Así, segundo confirmou a este diario José
Manuel Zapata, o xefe de distrito, xa se vendeu a práctica totalidade
da madeira procedente das árbores danadas nos montes de Ferrol, Eume e
Ortegal, esta última zona especialmente prexudicada.
Como se lembrará, os montes da serra da Capelada en particular, e todos
os de Cedeira en xeral, sufriron de forma especialmente grave os
envites do temporal. Aquí, a diferenza doutros municipios da comarca, o
Concello é propietario de gran parte da superficie arboredo da
Capelada, aínda que corresponde á Xunta de Galicia a xestión da mesma.
Neste sentido, José Manuel Zapata aclarou que, aínda que pertencen ao
Concello, estes terreos están consorciados coa administración
autonómica en virtude dunha lei de ámbito estatal que está en vigor
desde a década dos 40. Deste xeito, é a Xunta quen se ocupa deles, da
súa limpeza, coidado e, neste caso, de xestionar a venda, a quen e por
canto. A administración local, por suparte, cede esas terras ao Estado
para a súa explotación, iso si, compartindo os beneficios no caso de
que os haxa.
Sobre este asunto interesouse nos últimos días o Partido Popular de
Cedeira, desde onde se criticou a mala xestión que sobre este asunto
estaba a levarse a cabo desde o goberno de José Luís Vergara. O propio
alcalde confirmou a este diario que o Concello non tiña competencias
neste asunto e que ao ser montes consorciados é a Xunta a que decide.
Na mesma liña manifestouse José Manuel Zapata, quen esgrimiu que a
decisión de vender a madeira e as condicións da operación corresponden
unicamente á administración autonómica. Tamén asegurou que se trata de "montes catalogados como de titularidade pública".
Danos A superficie aproximada que resultou afectada na Capelada
rolda as 335 hectáreas, das cales 56 son exclusivamente da Xunta e as
279 restantes están consorciadas, é dicir, o Concello percibiría a
metade dos beneficios procedentes da súa venda, ao ser o propietario
das mesmas.
En canto ao traballo realizado polos enxeñeiros forestais e persoal do
Distrito 1, foi moi laborioso, segundo confirmou Zapata, quen explicou
que tras a análise de danos procedeuse a cortar as árbores
irrecuperables. O xefe de distrito tamén asegurou que se tentou facer
unha talla selectiva, aínda que nalgunhas zonas, debido á magnitude dos
danos, debeu cortarse o 100% da área afectada. Por outra banda, o
acceso a algunhas zonas foi especialmente dificultoso, xa que o
temporal non só danou as árbores, tamén as conexións por camiños
forestais ou estradas.
O "Klaus" tamén malogrou un proxecto posto en marcha desde o Distrito
Forestal I para dar a coñecer os traballos iniciados polos forestais
nos montes da zona. Trátase dunha ruta autoguiada que quedou
impracticable, segundo confirmou Zapata.
Crise Tendo en conta que o sector da construción é un dos
principais demandantes de madeira, a venda deste produto está a sufrir "un desastre de prezos", tal e como puxo de manifesto José Manuel
Zapata. O sector vive nestes momentos un complicado momento de reaxuste
da súa actividade, o que condicionou que os beneficios por estas
operacións diminúan de forma considerable. De feito, segundo Zapata, a
madeira da Capelada "vendeuse por unha cantidade tres veces menor á
establecida antes da época de crise". Así, neste caso concreto, o prezo
medio resultante de vender esta madeira, na súa maioría de piñeiro,
rolda os nove euros por tonelada, co que a venda das 14.400 toneladas
que se prevían recoller inicialmente -aínda non finalizou o proceso, co
que non hai cifras definitivas- arroxarían uns beneficios próximos aos
129.600 euros. Desta cantidade, o Concello percibiría a metade da parte
equivalente á madeira extraída das 279 hectáreas de titularidade
municipal.
Na depreciación do produto inflúen varios factores, segundo explicou o
xefe de distrito, ademais da crise na construción, que os danos se
producisen nun mes moi húmido, xa que nestas condicións a madeira tende
a danarse moito empeorando a súa calidade e obrigando a vender con máis
prema. Por outra banda, a posibilidade de deixala nos montes en busca
de mellores oportunidades económicas tamén se refugou debido a que
aumenta o risco de incendios. Así mesmo, canto máis tempo pase, máis
hai que agardar para repoboar a zona -cuxo estudo está xa en proxecto-,
o que leva unha nova perda, xa que canto antes plántense árbores de
novo antes iniciarán o seu proceso de crecemento, segundo informou José
Manuel Zapata. Outro factor negativo ao que fixo alusión o responsable
do Distrito Forestal da comarca é o feito de que moitos exemplares
quedaron partidos tras o paso do "Klaus", o que dificultou o seu
aproveitamento. Tampouco axudou que o temporal afectase tamén aos
montes do litoral de Francia, desde onde se colocou o material no
mercado con gran rapidez, segundo explicou Zapata.
Link: DFONLine
|
|
|
|
| |
Enlaces Relacionados | |
Votos del Artículo | |
Puntuación Promedio: 0 votos: 0
| |
Opciones | |
|
"Montes de titularidade pública" | Entrar/Crear Cuenta | 0 Comentarios |
| Los comentarios son propiedad de quien los envió. No somos responsables por su contenido. |
|
|
No se permiten comentarios Anónimos, Regístrate por favor |
|
|
|