O Valedor do Pobo é o alto comisionado do Parlamento de Galicia para a defensa dos dereitos e liberdades comprendidos no título I da Constitución e no Estatuto de Autonomía de Galicia. Con este fin e en xeral co obxecto de coñecer o pleno respecto á lei e o dereito, o Valedor do Pobo supervisará de oficio ou a instancia de parte (a través dunha queixa) a actividade da Administración da Comunidade Autónoma galega e dos seus entes e empresas públicas ou dependentes, así como a da Administración local naquelas materias que sexan competencia da nosa Comunidade.
© 2013 - Xunta de Galicia
A posibilidade de creación e organización dunha institución similar ao
Defensor del Pueblo recóllese no Estatuto de Autonomía de Galicia, en
concreto, no seu artigo 14. Esta posibilidade fíxose efectiva a través
da Lei 5/1984, do 5 de xuño, do Valedor do Pobo.
O Valedor do
Pobo é elixido polo Parlamento de Galicia a través dunha maioría
cualificada (3/5 dos membros do Parlamento) por un período de 5 anos, e
exercerá as súas funcións con autonomía e segundo o seu criterio, sen
atoparse suxeito a mandato imperativo e sen recibir instrucións de
ningunha autoridade.
Co fin de preservar a súa independencia e
imparcialidade establécese que as súas funcións son incompatibles con
todos os cargos políticos ou mandatos representativos e en xeral coa
actividade política; coa permanencia na Administración Pública; coa
afiliación a un partido político ou co desempeño de funcións directivas
neles ou en sindicatos, asociacións ou fundacións, ou co emprego nas
mesmas; co exercicio de carreira xudicial ou fiscal; ou con calquera
actividade profesional, mercantil ou laboral.
O Valedor do Pobo é
unha institución que non exerce funcións de tipo coercitivo, senón
unicamente de persuasión, de tal forma que a través das súas diferentes
actuacións pon en xogo a súa autoridade, para orientar e corrixir as
actuacións ou abstencións da Administración que coñece a través dos
procedementos correspondentes.
Link: Xunta de Galicia
