A Confraría de Pescadores de Cedeira impulsa un
proxecto de comercialización e diversificación empresarial que se
plasma, de momento, na construción dunha nave no polígono industrial da
Trabe. O pósito conta cunha subvención de 43.200 euros, outorgada polo
Ministerio de Industria, Enerxía e Turismo, dentro do programa de
axudas para actuacións de reindustrialización.
A achega do Goberno
central serviu para custear os trámites para a concesión da licenza de
obra por parte do Concello (proxecto básico e de execución, estudo
geotécnico e pagamento da licenza municipal).
Desde o pósito eluden cuantificar o
investimento global previsto, que financiarán a través de fondos
propios. Tampouco quixeron precisar o contido do proxecto, que
permitiría desde o uso da nova edificación como almacén ata o
desenvolvemento de procesos de transformación do peixe.
Pretenden
«diversificar», co propósito de conseguir «o mantemento e a
sustentabilidade» do pósito, adaptándose para iso «aos novos
requirimentos da actividade económica» xerada en torno ao sector
pesqueiro.
A parcela onde se está levantando a nova
construción foi adquirida pola confraría co apoio económico do
Ministerio de Industria, Turismo e Comercio, dentro da convocatoria
Reindus 2009.
A nave constitúe o primeiro paso dun proxecto de maior
envergadura, que se desenvolverá ao longo dos próximos anos, como
recalcan desde a entidade cedeirense, que neste momento conta con 70
socios.