O Concello de Cedeira recibiu nos últimos días un requirimento xudicial
no que se insta ao consistorio a facer valer a sentenza do TSXG de
outubro de 2010 na que se ordenaba a derriba dunha vivenda de rúa
María Auxiliadora, no paseo da Magdalena. A decisión xudicial baséase en
que a vivenda en cuestión, que recibiu licenza urbanística a escasos
días das pasadas eleccións municipais "gobernando entón o Bloque en
coalición co PSOE", vulnera varios preceptos do ordenamento xurídico.
Así mesmo, a licenza en cuestión outorgouse a pesar de emitir un informe
desfavorable por parte dos servizos urbanísticos municipais.
Na referida sentenza constátanse varias anomalías como que a vivenda non
se axusta á licenza de obra, tamén conta cunhas medidas superiores ás
previstas, alterando ata as dimensións do camiño público no que se
asenta.
O Concello debe facer valer a orde xudicial e instar aos propietarios do
inmoble a que repoñan a legalidade nos terreos, é dicir, a derrubar a
vivenda coñecida como a "media casa". De non levar a cabo a demolición, o
Concello poderá impor as preceptivas multas e, en última instancia,
actuar de forma subsidiaria e executar a derriba.
© 2011 - Diario de Ferrol
Consecuencias
Preguntado por este asunto, o alcalde de Cedeira,
José Luís Vergara, lamentaba que unha vez máis deban asumir os erros de
xestión de anteriores gobernos municipais durante o seu mandato. O
rexedor cedeirense recordou que durante estes catro anos xa deberon
facer fronte a outras irregularidades urbanísticas, debendo abonar
250.000 euros dunha sentenza do TSXG polas obras do polideportivo
municipal, executadas en 1987 pola empresa Padín, que denunciou
diferenzas entre o prezo de adxudicación da actuación e o custo real da
mesma.
Vergara teme agora que ao ser o Concello quen concedeu licenza de obra
deban asumir unha nova multa. O primeiro edil cifrou nuns 300.000 euros
os posibles gastos.
Link: DFONLine
