Portal de Noticias Cedeira OnLine Café Bar A MARINA - Concello de Cedeira

O polígono industrial A Trabe conta cunha nova empresa interesada en situarse nas instalacións cedeirenses. Trátase da firma galega Conic Vascular, dedicada á produción de material e patentes médicas, que ten a súa sede no municipio de Ames. O alcalde de Cedeira, José Luís Vergara, xa se reuniu cos responsables da empresa e visitou as instalacións centrais para coñecer o proxecto e os prazos administrativos aos que se enfrontarán a partir de agora, antes de poder asentarse no municipio. «Aínda que depende da mesma entidade, aquí constituirán unha nova empresa, que compartirá matriz coa sede que se atopa en Santiago», detalla Vergara.

O primeiro edil asegura que Conic Vascular prevé emprazar na vila mariñeira unha fábrica de produción de instrumental cirúrxico. «presentaron o proxecto no Ministerio de Industria para solicitar os fondos do Plan Reindus, e prevén recibir a resolución o primeiro trimestre do 2011», asegura Vergara Rei. O edil móstrase moi confiado co proxecto, e espera que non se lle presente ningún problema á entidade para recibir o crédito e as axudas necesarias. «Non só é un proxecto limpo co medio ambiente, senón que se trata dunha empresa vangardista e moi nova no campo do medicamento», ratifica o rexedor.

Unha vez conclúan os trámites para conseguir subvencións, a entidade deberá presentar o proxecto definitivo e o plan de construción á Xunta e ao Concello de Cedeira, para que a administración local apróbeo en pleno. A empresa prevé crear coa súa entrada en funcionamento entre doce e quince novos postos de traballo na vila que requiren persoal «de alta cualificación». «A mesma entidade encargarase de formar aos novos traballadores do persoal», asegura Vergara.

Link: VONLine