A Executiva Confederal trasladou na mañá deste martes 19 de outubro o
apoio da central sindical aos dous compañeiros que dende o pasado sábado
están en folga de fame para demandar unha xuntanza co Ministro de
Industria, a fin de buscar unha saída ás graves consecuencias que terá
para Galiza a entrada en vigor do Decreto do Carbón. Os/as membros da
Executiva acordaron manter a súa xuntanza semanal no local da CIG en As
Pontes para arroupar así a Fernando Branco e Alberte Amado e reclamar ao
goberno estatal a retirada da normativa, ou cando menos, que se
modifique o decreto atendendo a proposta concreta achegada pola central
nacionalista.
© 2010 - CIG
Gran manifestación o domingo 24 en FerrolA
CIG advirte que as medidas de protesta continuarán no eido xurídico,
institucional e social até que o goberno dea marcha atrás na súa
arbitraria decisión. Por iso, dende a central faise un chamamento á
participación masiva na manifestación convocada para o vindeiro domingo,
24 de outubro, en Ferrol. A marcha sairá ás 12:00 horas dende a Praza
de España.
Os/as membros que integran este órgano de representación da CIG
achegáronse por volta das dez da mañá até a caravana instalada diante
da Casa Concello de As Pontes para trasladar o apoio e solidariedade da
central ao responsábel local da CIG en As Pontes, Alberte Amado, e ao
delegado sindical da central en Endesa, Fernando Branco, os dous
compañeiros que dende o sábado pasado permanecen en folga de fame.
Con
este xesto, a Executiva pretendía dar ánimos os compañeiros na súa
loita, pero tamén visibilizar, unha vez máis, a rotunda oposición da
central nacionalista ao texto do Real Decreto, que na práctica suporá a
paralización das térmicas de Meirama e As Pontes, pondo en perigo a
continuidade de máis de tres mil postos de traballo e a supervivencia
económica de ambas comarcas, por mor dunha decisión puramente política.
Neste
senso, o Secretario Xeral da CIG, Xesús Seixo, quixo denunciar, durante
a visita aos dous folguistas, a “actitude de confusión” mantida tanto
polo PP como polo PSOE, posto que en Madrid permitiron que o decreto
saíse adiante, mentres que en Galiza se presentan “como os grandes
opositores á norma, mais sen concretar cales son as súas propostas
alternativas”.
Seixo rexeitou rotundamente as medidas compensatorias que
demandan os/as representantes políticos para Galiza, pois o noso País
“veuse afectado en numerosas ocasións por decisións do estado español e
da Unión europea que levaron a graves recortes na produción industrial, e
que logo se intentaron compensar con plans de industrialización e
reactivación fantasmas” sen incidencia real na creación de empregos ou
no desenvolvemento do tecido produtivo galego.
A central demanda unha reunión urxente co Ministerio de Industria
Alberte
Amado e Fernando Branco decidiron incrementar as medidas de presión que
a CIG está a desenvolver contra o Decreto do Carbón, logo de que o
Ministerio de Industria desoíse a petición de xuntanza trasladada dende a
Confederación Intersindical Galega, co obxecto de abordar as graves
consecuencias da nova normativa para as centrais térmicas galegas e
presentar a proposta concreta de modificación do Real Decreto da CIG.
Dita
proposta pasa por repartir entre toda as tecnoloxías do sector
eléctrico (nuclear, hidráulica, eólica, biomasa, fotovoltaica, carbón
importado, gas...), e en proporción a súa achega ao sistema, o cupo que
por motivos políticos se lle asigna ao carbón español. Na redacción
actual, que en poucos días podería entrar en vigor, esta cota reservada
só incide no carbón importado (que se usa nas centrais galegas) e nos
ciclos de gas. No caso de que o goberno estatal atendese a
solicitude da CIG, o impacto nas centrais galegas e nas empresas
auxiliares sería moito menor, así como en todos os sectores económicos
afectados polo Real Decreto (porto, transportistas, hostalaría,
talleres, etc.). Non obstante, dende a CIG continúase a demandar a
retirada completa deste Real Decreto e a súa reformulación.
Link: CIGONLine