Rodríguez Bereijo: “O uso preferente das linguas autonómicas é inconstitucional”
Cre que priorizar o galego sobre o castelán sería “contrario á Carta Magna”
O galego Álvaro Rodríguez Bereijo, ex presidente do Tribunal
Constitucional (TC), fala sen cancelas.
Nunha entrevista á revista do
Colexio de Avogados da Coruña, o catedrático de Dereito na Universidad
Autónoma de Madrid móstrase duro co Estatut de Cataluña, que considera
“unha reforma da Constitución pola porta de atrás”, e culpa o presidente
Zapatero de “crear o problema catalán” para despois “desprazalo a un
alto tribunal cando é un asunto puramente político”.
Rodríguez Bereijo, nado en Cedeira hai 72 anos, analiza con detalle o
fallo emitido polo TC sobre o Estatut de Cataluña e refírese tamén ás
cuestións de idioma. Nese aspecto, o catedrático é claro ao asegurar que
“o uso exclusivo ou preferente dunha lingua autonómica sobre a lingua
común é contrario ao que establece a Carta Magna”. “En calquera ámbito,
incluído o do ensino”, engade o ex presidente do TC, que cre que “a
cooficialidade non supón a exclusión da lingua común”.
Rodríguez Bereijo móstrase tamén en contra de incluír o termo nación
para definir Cataluña e incluso critica o fallo do TC neste ámbito, xa
que considera que empregou “solucións que non son plenamente
convincentes”.
“Un exemplo é o do preámbulo respecto ao concepto de nación e todos
os artigos do título preliminar”, asegura Álvaro Rodríguez Bereijo, que
cre que o que intentou o TC foi “resolver con ese equilibrio, sen saír
dos intrumentos xudiciais, un problema político que lle foi posto ante
el”.
Segundo o catedrático de Dereito, a polémica sobre o concepto de
nación debería ser “unha responsabilidade do Congreso dos Deputados non
momento no que analizaron a proposta de Estatut que lles enviou o
Parlament”.
Ademais, considera tamén que a posibilidade de que o Goberno conceda a
Cataluña a través doutros procedementos o que a setenza do TC nega ao
Estatut “podería constituír unha fraude á Constitución e ao seu máximo
intérprete, o Tribunal Constitucional, que non é o único pero si o
último e o máis alto”.
Segundo Bereijo, “o TC pagou un altísimo prezo por un asunto que non
debeu someterse ao seu xuízo na forma na que se fixo” e critica con
dureza as reaccións políticas: “Algunhas foron desmesuradas, como as dos
partidos cataláns”.
Link: XORONLine
