Portal de Noticias Cedeira OnLine Café Bar A MARINA

A Dirección Xeral de Emerxencias e Interior da Consellería de Presidencia, Administracións Públicas e Xustiza avisa dun episodio meteorolóxico adverso de nivel de alerta laranxa por mar de fondo e mar de vento, que afectará ao litoral de Galicia a partir das 18.00 horas de hoxe, 28 de decembro de 2009. O mar de fondo será moi forte na primeira parte e máis tarde será de oeste con ondas de 4 a 5 metros, tal e como informou a delegación territorial da Axencia Estatal de Metereoloxía (AEMET).

Así, co fin de garantir a seguridade dos bens e as persoas, a Dirección Xeral de Emerxencias e Interior, a través do Centro de Atención ás Emerxencias 112 Galicia, informou da situación de meteoroloxía adversa a todos os concellos costeiros da Comunidade Autónoma, aos organismos das administracións estatais, locais e autonómicas, aos servizos provinciais de Protección Civil da Consellería de Presidencia, Administracións Públicas e Xustiza e aos clubs náuticos. Deste xeito, agárdase que se adopten as medidas oportunas para garantir a seguridade dos bens e das persoas.

Tamén, recórdaselle á poboación a importancia de seguir as medidas de autoproteción como evitar aproximarse a diques ou rompentes co fin de previr un eventual golpe de mar que poida arrastrar persoas ou obxectos. Ademais, aconséllase consultar a páxina web do CAE 112 (www.112galicia.org), que conta con información meteorolóxica e con enlaces de interese.

Link: Xunta de Galicia